| s-1
| A-o sciô Aostin Pedevilla qd. G.B. |
| s-2
| Giardinê e mercante de limoin e çetroin, Nervi |
| s-3
| Milan, a-i 27 de frevâ do 1892. |
| s-4
| Cao Aostin |
| s-5
| Graçie di çetroin, che me son arrivæ; m'é arrivou ascì a vòstra lettia da settemaña passâ, a-a quæ daggo replica, e no capiscio comm'a l'é che no m'aggiæ mandou o conto de sta spediçion insemme à l'atro do meise de dexembre. |
| s-6
| Pe quello che me fæ scrive de vòstra figgia, a Tëxinin, che passou Pasqua vorriësci mandâ chì à Milan pe arvî unna butega de scioî fresche comme quella che tegnî à Zena, me despiaxe de no poei ësive de nisciun aggiutto e de no poeive dâ e informaçioin che ve servan, perché fin oua no conoscio ancon guæi de persoñe, e quelle pöche no s'accapiscian ni de scioî fresche e ni de scioî finte. |
| s-7
| No ve saviæ dî se quello comercio, sorviatutto de sti tempi, o pòsse dâ bon fruto: quella scignoa lombarda che oua a l'é à Nervi à passâ l'inverno e ch'a v'à dæto l'idea, e che quand'a vëgne à Milan a s'incarrega de tegnî vòstra figgia in cà sò, de dâghe a mente e de fâghe da moæ, a saià unna braviscima scignoa, no me n'indubito, e a l'avià de seguo e megio intençioin; in sciô comercio, ançi, peu dâse ch'a l'agge raxon. |
| s-8
| Ma s'aise da dâve un conseggio, mi, che ve conoscio che l'é pe coscì, ve daiæ quello, a-o manco pe oua, de no stâne à fâ ninte, e de contentâve da condiçion che o Segnô o v'à dæto, sensa stâ à çercâ d'allargâve guæi ò de mette tròppa carne in sciô feugo: tanto ciù che tra Zena e Nervi i vòstri comerci van avanti discretamente, comme voî mæximo m'ei dito à voxe tante vòtte. |
| s-9
| Do resto, i trafeghi e i comerci no son a mæ partia, e dæto che a borsa a l'é a vòstra, o megio giudiçe sei voî. |
| s-10
| Ciufito, de za che me ne parlæ e che inscistî pe piggiâ o mæ paei, quello che ghe tëgno à dîve o l'é che avanti de mandâ chì vòstra figgia, ve gh'appensæ doe vòtte: tutto o mondo o l'é paise, e se peu ëse onesti tanto à Milan comme à Nervi ò à Calcutta: a Tëxinin a l'é unna brava figgeua, de quelle savie, piña de sæximo e timô de Dio; ma sensa stâ à fâghe tòrto, a l'à unna testetta un pittinin tròppo addescia, che l'é façile dapeu ch'a pigge feugo. |
| s-11
| Ne sei pròpio seguo che feua cà, lonxi da-i vòstri euggi e da quelli de sò moæ, infiâ inte unna famiggia ch'ei conosciuo giusto pe caxo pe un meise ò doî, a se mantegnià delongo quello ch'a l'é oua, e che un giorno no aviei da pentîve à lagrime e sangue d'ësivene destaccou in raxon d'un guägno ch'o no l'é manco seguo? |
| s-12
| Se conoscemmo d'antigo, voî ve fiæ ben ben de mi, e aloa ve parlo sccetto: à sto mondo, mascime a-a giornâ d'ancheu, quande gh'é unna bella figgia comme a vòstra, de loî in gio no n'ammanca, satan feua da tutte e parte co-a bocca averta; e se un o no ghe stà ben attento, finisce che a figgia se â mangian, e aloa gh'é da cianze. |
| s-13
| Ma à quello ponto lì, cöse serve ciù cianze? |
| s-14
| De raxoin pe convinsive à lasciâ perde o vòstro progetto, gh'aviæ da dîvene fin à doman mattin, ma ghe vorriæ un libbro intrego, unna lettia a no basta; l'é façile che frustieiva a vòstra paçiensa, e quella da persoña ch'a v'à da leze a mæ palinòdia, e in sciâ fin arriviësci à fâme intende che se voei sentî de prediche, ve n'anæ in gexa. |
| s-15
| Ve diggo ciù unna cösa: â savei ben a fin ch'a l'à fæto a Marinetta, a figgia a ciù picciña da Françisca a Carboña, ch'ei conosciuo; e de chi a l'é a corpa, se no de sò moæ, pövea nescia, ch'a se creddeiva d'aveighe in cà a relichia do Santo Sepurto, e incangio de tiâla sciù comm'a doveiva, a gh'à mollou a brilla in sciô còllo e a s'é fiâ de un e de l'atro, tanto che solo lê a no s'accorzeiva che a figgeua a ghe ne fava de tutte e qualitæ, à pê comme à cavallo? |
| s-16
| Me diei che son cöse vege e stravege, e che no ghe pensa ciù nisciun; d'accòrdio, ma comme exempio, e tanto pe spëgiâseghe , no gh'é mai ninte de vegio, e un o peu piggiâ partio da tutto, à comensâ da Adammo e Eva. |
| s-17
| Me diei ascì, e con raxon, che inte nisciun caxo vòstra figgia a Tëxinin a l'é da mette in paragon co-a Marinetta; ô sò, ghe faiæ un gran tòrto à lê e à voî, solo che à pensâlo ; uña a l'é o giorno e l'atra a l'é a neutte, ma delongo pe fâ un exempio, pe-o ben che ve veuggio à voî e a-a vòstra famiggia, e da-o momento che voî mæximo me dî de parlâve sccetto e co-o cheu averto, ò vosciuo mensunâ quella desgraçiâ perché, con tutto che o vòstro caxo o segge affæto despægio, ve poësci fâ unn'idea de conseguense d'un passo fäso. |
| s-18
| Se capisce, o mæ conseggio o l'é pe-o no; ma se à voî ve gusta de ciù o scì, tanto megio, ò tanto pezo, e che o Segnô o ve benighe. |
| s-19
| Son o vòstro affeçionatiscimo Remigio Zena |
| s-20
| Incomensa l'evangëio de Gexù Cristo, o Figgio do Segnô. |
| s-21
| Comme gh'é scrito into profeta Isaia: «T'æ, mi mando o mæ messaggê primma de ti: quello ch'o l'à da inandiâ o tò cammin». |
| s-22
| Voxe de un ch'o cria into deserto: inandiæ o cammin do Segnô, addrissæ i seu sentê, gh'é stæto Zane, ch'o battezzava into deserto e o predicava un battezzo de converscion pe-o perdon di peccæ. |
| s-23
| A vegniva da lê tutta a region da Zudea e tutti i abitanti de Gerusalemme. |
| s-24
| E se favan battezzâ da lê into sciumme Zordan, e confessavan i seu peccæ. |
| s-25
| Sto Zane o l'ea vestio de pei de camelo, con unna çenta de pelle in gïo a-a vitta, o mangiava e grillasse e l'amê sarvægo e o diva: «Apreuvo à mi me ven un ch'o l'é ciù fòrte che mi: mi no son manco degno d'ascoacciâme à desligâghe i ligammi di cäsæ. |
| s-26
| Mi v'ò battezzou con de l'ægua, ma quello o ve battezzià into Sprito Santo». |
| s-27
| E t'æ, inte quelli giorni Gexù o vëgne da Nazareth de Galilea, e Zane ô battezza into Zordan. |
| s-28
| E comm'o sciòrte d'inte l'ægua, o vedde o çê ch'o s'arve e o Sprito ch'o ven zù in sce de lê comme unna comba. |
| s-29
| E se sente unna voxe da-o çê: «Ti t'ê o mæ figgio, quello ch'o m'é cao, e inte de ti me compiaxo». |
| s-30
| E tòsto o Sprito ô fa andâ into deserto, e into deserto o gh'arresta quaranta giorni, con Satan che ô tentava; o stava in mezo a-e bestie sarvæghe e i angei ô servivan. |
| s-31
| Quande an misso Zane in prexon, Gexù o l'é andæto à predicâ l'evangëio do Segnô inta Galilea, e o diva: «O tempo o l'é finio e o regno do Segnô o l'é da-a vexin; convertîve e creddei inte l'evangëio». |
| s-32
| Intanto ch'o passava in riva a-o mâ de Galilea, o vedde Scimon e Andria, o fræ de Scimon, che bollavan e ræ in mâ; defæti ean doî pescoei. |
| s-33
| Gexù o ghe dixe: «Vegnîme apreuvo, che ve fasso pescâ di òmmi». |
| s-34
| E quelli mòllan tòsto e ræ, e se ghe mettan apreuvo. |
| s-35
| O va un pittin ciù avanti, e o vedde ascì Giacomo de Zebedeo e sò fræ Zane, into gosso, che davan recatto a-e ræ. |
| s-36
| O î ciamma. |
| s-37
| E quelli lascian sò poæ Zebedeo in sciô gosso co-i garsoin e ghe van apreuvo lô ascì. |
| s-38
| Arrivan in Cafarnao pròpio a-o sabbo, e Gexù o l'intra inta scinagöga e o se mette à dâ leçion. |
| s-39
| E se mäveggiavan tutti de quello ch'o mostrava, perché o ghe mostrava comme un ch'o sa e cöse d'autoritæ, e no comme un scrivan. |
| s-40
| Aloa un òmmo ch'o l'ea inte quella scinagöga, e ch'o l'aiva inte de lê un sprito de quelli sossi, o s'é misso à criâ, e o diva: «Comme ti gh'intri ti con niatri, Gexù de Nazaret? ti n'ê vegnuo à arroinâ? |
| s-41
| Mi ô sò chi t'ê: o santo do Segnô». |
| s-42
| E Gexù o ghe braggia: «Taxi! |
| s-43
| E sciòrti feua da quell'òmmo». |
| s-44
| E quello sprito sosso ô straggiava e o criava fòrte, ma o l'é sciortio da lê. |
| s-45
| Tutti se son attrovæ poia, tanto che se divan un con l'atro: «E comm'a l'é sta cösa? |
| s-46
| Unna dötriña neuva e o â mostra con autoritæ. |
| s-47
| O commanda fiña a-i spriti sossi, e ghe dan a mente!». |
| s-48
| Coscì a sò nòmina a s'é spantegâ a-a lesta, in sà e in là in gïo pe-a Galilea. |
| s-49
| Comme son sciortii de d'inta scinagöga, son andæti aviou in cà de Scimon e de Andria, insemme à Giacomo e à Zane. |
| s-50
| A seuxoa de Scimon a l'ea in letto co-a freve, e ghe n'an giusto parlou. |
| s-51
| Lê o ghe va arente, o â piggia pe-a man e o â tïa sciù; a freve a gh'é passâ e a s'é missa à servîli . |
| s-52
| Comme s'é fæto seia e l'é andæto sotta o sô, ghe portavan tutti i maròtti e i indemoniæ. |
| s-53
| Gh'ea tutta a çittæ lì da-a pòrta. |
| s-54
| O l'à fæto stâ ben tanti de quelli ch'ean afferræ da uña ò da l'atra mouttia e o l'à mandou via un muggio de diäi; ma i diäi o no î lasciava parlâ, perché ô conosceivan. |
| s-55
| A-a mattin fito o l'é stæto sciù che l'ea ancon scuo, o l'é sciortio d'in cà, e o s'é arretiou int'un pòsto deserto pe mettise à pregâ. |
| s-56
| Ma Scimon e quelli che gh'ea insemme ghe son andæti apreuvo. |
| s-57
| Ô treuvan, e ghe fan: «Ammia che son tutti lì che te çercan!». |
| s-58
| E lê o ghe dixe: «Andemmosene da quarche atra parte in gïo pe-i paixi di contorni, coscì predico lì ascì: l'é ben pe quello che son vegnuo!». |
| s-59
| E coscì o se n'é andæto pe tutta a Galilea, o predicava inte quelle scinagöghe e o scorriva i diäi. |
| s-60
| L'é vegnuo da lê un leproso: ô pregava in zenoggion e o ghe diva: «Se ti veu, ti ti me peu fâ stâ ben!». |
| s-61
| O gh'à fæto pròpio de mäprô. |
| s-62
| O destende a man, ô tocca e o ghe dixe: «Öscì che veuggio, stanni ben!». |
| s-63
| A lepra a l'é scentâ tutt'insemme e quello o stava torna ben. |
| s-64
| Lê o s'é misso à ammonîlo , e intanto che ô mandava via a-a lesta o gh'à dito: «Ammia ben de no dî ninte à nisciun, ançi vanni à fâte vedde da-o saçerdöte e danni pe-a tò purificaçion quello ch'o l'à prescrito Mosè, comme testimoniansa pe-i atri». |
| s-65
| Ma quello, comm'o se n'é andæto, o l'à comensou à contâ in gïo quello che l'ea avvegnuo, tanto che Gexù o no poeiva ciù intrâ inte unna çittæ avertamente, e o se ne stava de feua, inte di pòsti abbandon֯æ, ma vegnivan pægio da lê da tutte e parte. |
| s-66
| Arbâ o l'é un quartê rescidensiâ do commun de Zena, poxiçionou à levante da çittæ antiga e de quello da Foxe. |
| s-67
| Fin a-o 1874 o l'é stæto un commun indipendente co-o nomme de San Françesco d'Arbâ. |
| s-68
| A-a giornâ d'ancheu, assemme a-i quartê da mæxima Foxe e de San Martin d'Arbâ, o forma o Muniçipio VIII da çittæ de Zena (Medio Levante). |
| s-69
| Fin da-o secolo sezze o l'à dæto abergo à de ville tra e ciù avvoxæ da Repubrica, deuviæ da-e famigge patriçie pe-o villezzo da stæ. |
| s-70
| O quartê d'Arbâ o comprende a parte ciù a-o meridion da colliña ch'a pòrta o mæximo nomme, urtima porçion de l'ertua ch'a dividde e vallæ di riæ Besagno e Sturla. |
| s-71
| A colliña a finisce in sciô mâ con de erte scuggee che chì e lì abergan de ciazzette donde in antigo se poeiva arrivâ solo co-o passâ pe de streite creuse tra òrti e giardin. |
| s-72
| Ancheu, in cangio, a linia de mæña a l'é percorsa do tutto da-o longomâ de corso Italia. |
| s-73
| L'antiga çircoscriçion a comprende a ciù parte do territöio de l'antigo commun de San Françesco d'Arbâ, con l'ecceçion de fraçioin de Borgo Pilla e de unna parte da ciaña do Besagno (oua do tutto urbanizzâ e compreisa into quartê da Foxe) e Vernasseua, antigo borgo de mainæ che ancheu o l'é parte do quartê de Sturla. |
| s-74
| Les Aventures de Tintin a l'é unna colleçion belga de stöie disegnæ, dæta a-a luxe e produta da-o 1929 a-o 1983 da Hergé (nommiagio de Georges Remi) e basâ in sciô personaggio de fantaxia Tintin, ch'o dà o nomme a-a collaña mæxima. |
| s-75
| Graçie a-e seu duxentoçinquanta mioin de còpie vendue, Les Aventures de Tintin o l'é un di produti de stöie disegnæ ciù avvoxæ e conosciui do vinteximo secolo. |
| s-76
| I volummi da colleçion en stæti traduti inte un çentanâ de lengue, anche de minoransa, e an conosciuo ben ben d'adattaçioin pe-o cine, a televixon e o tiatro. |
| s-77
| E avventue an leugo inte un universo o ciù de vòtte realistico e presentan di personaggi da-o carattere ben definio. |
| s-78
| O personaggio prinçipâ o l'é Tintin, un zoeno ch'o travaggia da reporter, accompagnou inte seu avventue da-o cagnetto Milou. |
| s-79
| Da maniman che e neuve avventue en stæte scrite e disegnæ l'é comparso di atri personaggi che saieivan diventæ ricorrenti, comme o capitanio Haddock (ch'o saiæ fiña vegnuo un di personaggi prinçipæ de stöie da collaña), i investigatoî Dupond e Dupont ò o professô Tournesol. |
| s-80
| E avventue da colleçion en contestualizzæ inta stöia do vinteximo secolo za da-a primma sciortia, ambientâ inte l'Union Sovietica do 1929 e inta Repubrica de Weimar. |
| s-81
| Anche e avventue pubricæ ciù tardi an da fâ con di contesti de realtæ, comme o Congo do 1930 (che alantô a l'ea colònia do Belgio), l'America do nòrd do 1933, a Ciña occupâ da-i giapponeixi do 1934, l'Inghiltæra, o Belgio e a Scòçia do 1937, un stato de fantaxia de l'Euröpa de l'est ch'o se peu identificâ con l'antigo Regno da Iugoslavia do 1940 e l'Austria dòppo l'invaxon di todeschi, pe arrivâ fiña in sciâ Luña, a-o desvio d'arioplen e a-i dittatoî sudamerichen. |
| s-82
| A realizzaçion de tutte ste ambientaçioin a l'é stæta poscibile pe mezo de un travaggio de reçerca approfondio da parte de l'autô. |
| s-83
| O stilo ch'o caratterizza e pagine (un træto ciæo e netto, sensa di segni che no seggian quelli essençiæ), dapeu ciammou co-o nomme de ligne claire, o rende a serie unna precursoa e un modello de referensa pe-a scheua franco-belga de stöie disegnæ. |
| s-84
| Bello Segnô cao, che mâ de pê. |
| s-85
| Ciù un pö no me piggia un açidente. |
| s-86
| Ma sensa sta corsa no ghe l'aviæ fæta maiciù à sciortî da-o campo de vixon do gruppo. |
| s-87
| Me pâ d'ëse un figgeu. |
| s-88
| Che axima! |
| s-89
| L'ea trent'anni che no me metteiva à corrî coscì. |
| s-90
| Fòscia fiña de ciù. |
| s-91
| Diascoa, gh'ò o cheu inta goa. |
| s-92
| Î ò ciantæ in gio, oua beseugna che me pöse un pittin. |
| s-93
| E che mange quarcösa. |
| s-94
| Sta chì a dovieiva ëse unna zöna de restoranti. |
| s-95
| Ben, seguo ch'a ô l'é, semmo into cheu da çittæ. |
| s-96
| Ò coæ d'assazzâ e speçialitæ da region. |
| s-97
| Ma no comme tutti quelli turisti che s'ammuggian in scî töin davanti a-o risseu da gexa romanica. |
| s-98
| Çerchiò inti carroggi chì da vixin un bello pòsto tipico. |
| s-99
| Ancon un sfòrso, dapeu porriò gödîme a çeña. |
| s-100
| Do resto l'é za sëi oe do poidisnâ, l'é giusto l'oa de mangiâ. |