| s-401
| Եւ կին մի էր ի տեռատեսութեան արեան յամաց երկոտասանից՝ որում ոչ էր լեալ հնար յումեքէ բժշկել՝ մատուցեալ յետոյ մերձեցաւ ի քղանցս հանդերձի նորա, եւ նոյնժամայն եկաց բղխումն արեան նորա: |
| s-402
| Եւ ասէ Յիսուս՝ ո՞վ է որ մերձեցաւն յիս: |
| s-403
| Իբրեւ ամենեքեան ուրանային. ասէ Պետրոս եւ որ ընդ նմայն եին՝ վարդապետ, ժողովուրդքդ պնդեն եւ նեղեն զքեզ: |
| s-404
| Եւ ասէ Յիսուս՝ ոմն մերձեցաւ յիս, քանզի գիտացի եթե զաւրութիւն ել յինէն: |
| s-405
| Իբրեւ ետես կինն եթե ոչ ծածկեցաւ ի նմանէ եկն դողալով, եւ անկաւ առաջի նորա, թե վասն որոյ իրաց մերձեցաւ ի նա՝ պատմեաց առաջի ամենայն ժողովրդեանն, եւ թե որպէս բժշկեցաւ առժամայն: |
| s-406
| Եւ ասէ ցնա՝ քաջալերեաց դուստր՝ հաւատք քո կեցուցին զքեզ, երթ ի խաղաղութիւն: |
| s-407
| Եւ մինչդեռ նա խաւսէր՝ գայ ոմն ի տանէ ժողովրդապետին եւ ասէ ցնա՝ մեռաւ դուստրն քո, մի ինչ աշխատ առներ զդա: |
| s-408
| Իսկ Յիսուս իբրեւ լուաւ. պատասխանի ետ նմա եւ ասէ՝ մի երկնչիր՝ միայն հաւատայ. եւ կեցցէ: |
| s-409
| Եւ մտեալ ի տունն՝ ոչ զոք եթող մտանել. բայց միայն զՊետրոս եւ զՅակովբոս եւ զՅովհաննէս, եւ զհայր մանկանն. եւ զմայր նորա: |
| s-410
| Լային ամենեքեան եւ կոծեին զնա: |
| s-411
| Եւ նա ասէ՝ մի լայք՝ զի չէ մեռեալ. այլ ննջէ: |
| s-412
| Եւ նոքա ծաղր առնեին զնա. զի գիտեին թե մեռաւ: |
| s-413
| Եւ նորա հանեալ զամենեսին արտաքս կալաւ զձեռանէ նորա. |
| s-414
| բարբառեցաւ եւ ասէ՝ արի կաց մանուկ դու: |
| s-415
| Եւ դարձաւ ոգի նորա՝ եւ կանգնեցաւ վաղվաղակի՝ եւ հրամայեաց տալ նմա ուտել՝ |
| s-416
| եւ զարմացան ծնաւղքն նորա՝ |
| s-417
| եւ նա պատուիրէր մի ումեք ասել որ ինչ եղեւն: |
| s-418
| Յետ այսորիկ գնաց Յիսուս յայնկոյս ծովուն Գաղիղեացւոց Տիբերեայ՝ |
| s-419
| եւ զհետ երթայր նորա ժողովուրդ բազում՝ զի տեսանեին զնշանսն զոր առնէր ի վերայ հիւանդաց: |
| s-420
| Ել ի լեառնն Յիսուս՝ |
| s-421
| եւ անդ նստէր աշակերտաւքն հանդերձ: |
| s-422
| Եւ էր մերձ զատիկ տաւնն հրէից: |
| s-423
| Բարձ ի վեր զաչս իւր Յիսուս՝ եւ ետես զի ժողովուրդ բազում գայր առ նա՝ ասէ ցՓիղիպպոս՝ ուստի՞ գնեսցուք հաց զի կերիցեն դոքա: |
| s-424
| Զայս ասէր փորձելով զնա՝ այղ ինքն գիտէր զինչ առնելոցն էր: |
| s-425
| Պատասխանի ետ նմա Փիղիպպոս՝ երկերիւր դահեկանի հաց չէ դոցա բաւական. թեպէտ եւ իւրաքանչիւր ոք սակաւ ինչ առնուցու: |
| s-426
| Ասէ ցնա մի յաշակերտացն նորա՝ Անդրեաս եղբայր Սիմովնի Վիմի: |
| s-427
| է աստ պատանեակ մի որ ունի հինգ նկանակ գարեղէն, եւ երկուս ձկունս՝ այղ այն զի՞նչ է առ այդչափ մարդիկ: |
| s-428
| Ասէ Յիսուս՝ բազմեցուցէք զմարդիկն: |
| s-429
| Եւ էր խոտ յոյժ ի տեղւոջն՝ եւ բազմեցան մարդիկն թուով իբրեւ հինգ հազար: |
| s-430
| Եւ առ զհացն Յիսուս՝ եւ գոհացաւ՝ եւ բաշխեաց բազմականացն՝ նոյնպէս եւ ձկանցն որչափ եւ կամեցան: |
| s-431
| Եւ իբրեւ յագեցան, ասէ ցաշակերտսն ժողովեցէք զնշխարեալ կոտորսդ. զի մի ինչ կորիցէ: |
| s-432
| ժողովեցին եւ լցին երկոտասան սակառի զկոտորոց ի հինգ գարեղէն նկանակէ անտի. որ յաւելաւ ի կերաւղացն: |
| s-433
| Իսկ մարդիկն իբրեւ տեսին զնշանսն զոր արար. ասեին եթե սա է ճշմարիտ մարգարէն որ գալոցն էր յաշխարհ: |
| s-434
| Յիսուս իբրեւ գիտաց թե գալոց են յափշտակել զնա զի արասցեն զնա թագաւոր: Գնաց դարձեալ ի լեառնն միայն: |
| s-435
| Եւ իբրեւ երեկոյ եղեւ. իջին աշակերտքն նորա ի ծովեզրն՝ |
| s-436
| եւ մտեալ ի նաւ. գային յայնկոյս ծովուն ի Կափառնաում՝ |
| s-437
| եւ իբրեւ նսեմացաւ՝ եւ չեւ եւս եկեալ էր առ նոսա Յիսուս՝ |
| s-438
| եւ ծովն ի սաստիկ հողմոյ շնչելոյ յուզէր: |
| s-439
| Եւ վարեալ իբրեւ ասպարէսս քսան եւ հինգ կամ երեսուն. տեսանեին զՅիսուս զի գայր ի վերայ ծովուն՝ եւ մերձ էր ի նաւն. զարհուրեցան յոյժ: |
| s-440
| Նա ասէ ցնոսա՝ ես եմ մի երկնչիք: |
| s-441
| Եւ կամեին զնա ընդունել ի նաւն. եւ վաղվաղակի եհաս նաւն յերկիրն յոր երթային: |
| s-442
| Ի վաղիւ անդր ժողովուրդն որ կայր յայնկոյս ծովուն՝ տեսանէր թե այլ նաւ ոչ գոյր անդ բայց միայն միոյն յոր մտին աշակերտքն Յիսուսի՝ եւ զի չէր մտեալ Յիսուս ընդ աշակերտսն իւր ի նաւն՝ բայց միայն աշակերտքն նորա գնացին՝ |
| s-443
| իբրեւ այլ նաւքն գային ի Տիբերեայ մաւտ ի այն տեղի ուր զհացն կերան: |
| s-444
| Իսկ իբրեւ ետես ժողովուրդն. եթե Յիսուս ոչ է անդ՝ եւ ոչ աշակերտք նորա, առին նոքա զնաւսն եւ եկին ի Կափառնաում խնդրել զՅիսուս: |
| s-445
| Եւ իբրեւ գտին զնա յայնկոյս ծովուն՝ ասեն ցնա՝ ռաբբի. ե՞րբ եկիր այսր: |
| s-446
| Պատասխանի ետ նոցա Յիսուս եւ ասէ՝ ամէն ամէն ասեմ ձեզ՝ խնդրէք դուք զիս. իբր ոչ եթե զի նշանս ինչ տեսէք՝ այղ զի կերայք ի հացէ անտի. եւ յագեցարուք: |
| s-447
| Երթայք գործեցէք մի զկորստական կերակուրն՝ այղ զկերակուրն որ մնայ ի կեանսն յաւիտենականս. զոր որդին մարդոյ տացէ ձեզ՝ քանզի զնա հայրն կնքեաց Աստուած: |
| s-448
| Ասեն ցնա՝ զի՞նչ առնիցեմք զի զգործսն Աստուածոյ գործեսցուք: |
| s-449
| Պատասխանի ետ Յիսուս եւ ասէ ցնոսա՝ այս է գործն Աստուածոյ՝ զի հաւատասջիք յայն որ առաքեացն զիս: |
| s-450
| Ասեն ցնա՝ զի՞նչ նշան առնիցես՝ զի տեսցուք. եւ հաւատասցուք՝ զի՞նչ գործիցես: |
| s-451
| Հարքն մեր կերան զմանանայն յանապատի անդ՝ որպէս եւ գրեալ է՝ հաց երկնից ետ նոցա ուտել: |
| s-452
| Ասէ ցնոսա Յիսուս՝ ամէն ամէն ասեմ ձեզ՝ եթե ոչ Մովսէս ետ ձեզ զհացն յերկնից՝ այլ հայրն իմ տայ ձեզ զհացն յերկնից, ճշմարիտ՝ զի հաց յԱստուածոյ է՝ որ իջանէն յերկնից. եւ կեանս տայ աշխարհի: |
| s-453
| Ասեն ցնա՝ Տէր. յամենայն ժամ տուր մեզ զհացն զայն: |
| s-454
| Ասէ ցնոսա Յիսուս՝ ես եմ հացն կենաց: |
| s-455
| Որ գայ առ իս. ոչ քաղցիցէ՝ եւ որ հաւատայ յիս. ոչ երբեք ծարաւեսցի: |
| s-456
| Այլ ասացի ձեզ՝ թե տեսէք զիս. եւ ոչ հաւատայք: |
| s-457
| Զամենայն զոր տայ ինձ հայր. առ իս եկեցէ՝ եւ որ գայ առ իս. ոչ հանից արտաքս: |
| s-458
| Զի իջի ես յերկնից՝ ոչ զի զկամս իմ արարից՝ այղ զկամս այնորիկ որ առաքեացն զիս: |
| s-459
| Այս են կամք հաւր իմոյ որ առաքեացն զիս՝ զի զամենայն զոր ետ ցիս հայր ոչ կորուսից ի նմանէ՝ այղ յարուցից զնա յաւուրն յետնում: |
| s-460
| Այս են կամք հաւր իմոյ՝ զի ամենայն որ տեսանիցէ զորդի եւ հաւատայցէ ի նա. ընկալցի զկեանսն յաւիտենականս՝ եւ ես յարուցից զնա յաւուրն յետնում: |
| s-461
| Տրտնջեին զնմանէ հրեայքն՝ զի ասաց թե ես եմ հացն իջեալ յերկնից՝ եւ ասեին՝ |
| s-462
| ոչ սա է որդին Յովսէփո՞ւ զորոյ մեք գիտեմք զհայրն. |
| s-463
| իսկ արդ զիա՞րդ ասէ եթե ես յերկնից իջի: |
| s-464
| Պատասխանի ետ Յիսուս եւ ասէ ցնոսա՝ մի քրթմնջէք ընդ միմեանս՝ |
| s-465
| ոչ ոք կարէ գալ առ իս. եթե ոչ հայրն որ զիս առաքեաց ձգեսցէ զնա՝ եւ ես յարուցից զնա յաւուրն յետնում: |
| s-466
| Գրեալ է ի մարգարէս եւ եղիցին ամենեքեան ուսեալք Աստուածոյ՝ ամենայն որ լսէ ի հաւրէ եւ ուսանի. գայ առ իս: |
| s-467
| Իբր ոչ եթե զհայր ուրուք տեսեալ իցէ՝ եթե ոչ որ էն յԱստուածոյ. |
| s-468
| նա ետես զհայր: |
| s-469
| Ամէն ամէն ասեմ ձեզ՝ զի որ հաւատայ. ընդունի զկեանսն յաւիտենականս: |
| s-470
| Ես եմ հացն կենաց՝ |
| s-471
| Հարքն ձեր կերան զմանանայն յանապատին. եւ մեռան: |
| s-472
| Այս է հացն որ յերկնից իջեալ է՝ զի որ ուտիցէ ոք ի սմանէ. մի մեռանիցի: |
| s-473
| Ես եմ հացն կենդանի որ յերկնից իջեալ՝ եթե ոք ուտիցէ ի հացէ յայսմանէ. կեցցէ յաւիտեան: |
| s-474
| Եւ հացն զոր ես տաց. մարմին իմ է զոր ես տաց վասն կենաց աշխարհի: |
| s-475
| Մարտնչեին ընդ միմեանս հրեայքն եւ ասեին՝ զիա՞րդ կարէ սա տալ մեզ զմարմին իւր յուտել: |
| s-476
| Ասէ ցնոսա Յիսուս՝ ամէն ամէն ասեմ ձեզ՝ եթե ոչ կերիջիք զմարմին որդւոյ մարդոյ՝ եւ արբջիք զարիւն նորա. ոչ ունիք կեանսն յանձինս: |
| s-477
| Որ ուտէ զմարմին իմ, եւ ըմպէ զարիւն իմ. ունի զկեանսն յաւիտենականս՝ եւ ես յարուցից զնա յաւուրն յետնում: |
| s-478
| Զի մարմինն իմ, ճշմարիտ կերակուր է՝ եւ արիւն իմ ճշմարիտ ըմպելի է: |
| s-479
| Որ ուտէ զմարմին իմ, եւ ըմպէ զարիւն իմ. յիս բնակեսցէ. եւ ես ի նմա: |
| s-480
| Որպէս առաքեաց զիս կենդանին հայր, եւ ես կենդանի եմ վասն հաւր, եւ որ ուտէն զիս եւ նա կեցցէ վասն իմ: |
| s-481
| Այս է հացն որ յերկնից իջեալ. ոչ որպէս կերան հարքն ձեր զմանանայն եւ մեռան. որ ուտէ զհացս զայս կեցցէ յաւիտեան: |
| s-482
| Զայս ասաց ի ժողովրդեանն յուսուցանելն ի Կափառնայում: |
| s-483
| Եւ բազումք յաշակերտացն իբրեւ լուան, ասեն. |
| s-484
| Խիստ է բանդ այդ, ո՞վ կարէ լսել դմա: |
| s-485
| Իբրեւ գիտաց Յիսուս յանձն իւր եթե տրտնջեն վասն այնորիկ աշակերտքն նորա, ասէ ցնոսա. |
| s-486
| Այդ գայթակղեցուցանէ՞ զձեզ: |
| s-487
| Իսկ արդ, եթե տեսանիցէք զՈրդի մարդոյ, զի ելանիցէ ուր էր զառաջինն: |
| s-488
| Հոգին է կենդանարար, մարմին ինչ ոչ աւգնէ. զբանն զոր ես խաւսեցայ ընդ ձեզ` հոգի է եւ կեանք: |
| s-489
| Այլ են ոմանք ի ձէնջ որ ոչ հաւատան. |
| s-490
| քանզի գիտէր Յիսուս ի սկզբանէ ով են այնոքիկ որ ոչն հաւատան, եւ ով այն է որ մատնելոցն է զնա: |
| s-491
| Եւ ասէր. Վասն այնորիկ ասացի ձեզ թե ոչ ոք կարէ գալ առ իս, եթե ոչ իցէ տուեալ նմա ի Հաւրէ իմմէ: |
| s-492
| Յայսմանէ բազումք յաշակերտացն նորա չոգան յետս, եւ ոչ եւս շրջէին ընդ նմա: |
| s-493
| Ասէ Յիսուս ցերկոտասան աշակերտսն. մի թե եւ դո՞ւք կամիք երթալ: |
| s-494
| Պատասխանի ետ նմա Սիմովն Պետրոս. Տէր, առ ո՞վ երթիցուք, բանս կենաց յաւիտենականաց ունիս: |
| s-495
| Եւ մեք հաւատացաք եւ ծանեաք եթե դու ես Քրիստոսն Որդի Աստուծոյ: |
| s-496
| Պատասխանի ետ նոցա Յիսուս. Ո՞չ ես զձեզ զերկոտասանսդ ընտրեցի, եւ միդ ի ձէնջ սատանայ է: |
| s-497
| Եւ ասէր զՍիմովնեան Յուդայէ Իսկարիովտացւոյ, զի նա իսկ մատնելոց էր զնա, եւ մի էր յերկոտասանիցն: |
| s-498
| Եւ յետ այսորիկ շրջէր Յիսուս ի Գաղիղեա՝ քանզի ոչ կամէր ի Հրէաստանի շրջել՝ զի խնդրեին զնա հրեայքն սպանանել: |
| s-499
| Եւ էր մերձ տաւնն հրեից տաղաւարահարաց: |
| s-500
| Ասեն ցնա եղբարքն նորա՝ գնա աստի եւ երթ ի Հրէաստան՝ զի եւ աշակերտքն քո տեսցեն զգործսդ քո զոր գործես՝ զի ոչ ոք է որ ի ծածուկ ինչ գործէ. եւ խնդրէ ինքն համարձակ լինել՝ եթե զայդ գործես. յայտնեա զանձն քո աշխարհի: Քանզի եւ եղբարքն իսկ չեին հաւատացեալ ի նա: |