| s-201
| А Гарман ваш нам на то слюбил и руку на том дал, што кн(я)зя великог(о) купьцом полочаном оу Ризе торговати доброволно, и за море пут(ь) ч(и)стъ, водою и сухим путем, как издавна бывало по старому. |
| s-202
| А дасть ли пак кн(я)зь ваш мештерь купцом полочаном за море пут(ь) ч(и)стъ, а оу нас вашим купцом ризким пут(ь) ч(и)стъ к Витебску и к Смоленску. |
| s-203
| А ваши записи старые оу полочан, а полоцкии записи старыи оу вас. |
| s-204
| А как Гарман ваш намъ слюбил и руку дал, што нашим купцом полочаном за море пут(ь) ч(и)стъ торговати, и мы по тому слюбенью по Гармонову ваших есмо купцов пропустили к Витебьску и к Смоленску, ѡлиж и на Москвѣ побывали. |
| s-205
| А как слюбите нам, што нашим купцом полочаном дадите за море пут(ь) ч(и)стъ торговати водою и сухим путем, а мы и н(ы)нѣ ваших купцов пропустимъ к Витебьску и к Смоленку по старому. |
| s-206
| А такжо послали есмо слугу своего Дашка и полочанъ до Риги своим дѣлом своими рѣчми. |
| s-207
| А ѡтсюле поѣхали водою, а ѡтле оужо нелга ѣхати водою — замержеть, и ѡни собѣ там кони покупят(ь). |
| s-208
| Ино прошю вас, своих приятелеи, штобы есте их пропустили доброволно. |
| s-209
| Поч(е)снымъ мужомъ, приятелем нашимъ, ратманомъ ризкимъ |
| s-210
| + Сии суд судил пан Ѡндрѣи Сакович, намѣстник полоцкии, и з боѧры полоцкими и с мѣстич(и). |
| s-211
| Искалъ Евлашко Козчич на Ѡлександрѣ на Ѡскерчинич(е) оу ѡзерѣ оу Солонци собе доли. |
| s-212
| А молыть Евлашко так: «Моѧ землѧ пришла к тому ѡзеру к Солонцю. |
| s-213
| Чому мнѣ доли нетъ оу том ѡзерѣ? |
| s-214
| А к другому ѡзеру к Рѧсну моѧ землѧ пришла и твоѧ, Александрѣ, ино мнѣ оу том ѡзере оу Рѧснѣ половица а оу Солонцѣ. |
| s-215
| Чого длѧ менѣ не пустиш(ь)? |
| s-216
| А моѧ землѧ тако ж пришла, как и твоѧ» . |
| s-217
| И Ѡлеѯ(а)ндро молыть: «То ѡзеро Солонцѣ нашѣ питомое и ѡтрублено нам, а есть и рубежи» . |
| s-218
| И просили оу нас ездоковъ. |
| s-219
| И мы посылали боѧрина полоцког(о) пана Микиту Ѡплечуева а слугу нашог(о) Миклаша Чеха. |
| s-220
| И ѡни, там ездившо, тог(о) не досмотрѣли, конца не вчинили, толко принесли к нам рꙋбежи. |
| s-221
| И Евлашко молыть: «То, деи, рубежи неправыи» . |
| s-222
| И запросили оу нас других ездоков. |
| s-223
| И мы послали боѧрина полоцког(о) Ходѡра Радкович(а) а Миклаша, тог(о) жо нашог(о) слугу, Чеха. |
| s-224
| И Ходѡръ Радкович там ездил, а собрал мног(о) людеи добрых, да тых ребежов и с мужми смотрили, и ѡтказал нам, што ж, деи, неправыи рубежи вси мужи положили, а правых рубежов не нашли. |
| s-225
| И мы Ѡлександра оу том повинили. |
| s-226
| А ещо Ѡлеѯ(а)ндро ставил ставил собе своеи земли рубеж ѡт Евлашковыи земли по речку Глубочицу. |
| s-227
| Ино земци Евлашку ѡтвели рубеж по дорогу. |
| s-228
| Ино таѧ речка Глубочица оу Евлашковѣ земли. |
| s-229
| И ездоки измерили ѡт речки до дороги, ино полпѧтадесѧтъ сажон. |
| s-230
| Ино Ѡл(е)ѯ(а)ндро и в том виноватъ стал, што Евлашкову землю заходил собою. |
| s-231
| А потом Евлашко молыть Ѡл(е)ѯ(а)ндру: «Был нам и с тобою ѡ том ѡзерѣ Солонци рядъ перед добрыми людми. |
| s-232
| А давалъ ты мнѣ, Ѡл(е)ѯ(а)ндро, четвѣртую долю сам оу том ѡзере оу Солонци, ино ѧ не хотел имати» . |
| s-233
| И Ѡл(е)ѯ(а)ндро молыть: «Не давал есми» . |
| s-234
| И послалисѧ на добрыи люди, на мѣстич(и) и на землѧнѣ, на свои суседи, на имѧ на Пахомъѧ на Ѡдинца, а на Филка Чиковчинич(а), а на Ивана Ѡникъевич(а), а на Яцка на Козчич(а), а на Васка на Красавку, а на Пилипка на Телитчинич(а). |
| s-235
| И мы тых поставити велели перед собою и ѡпросили есмо ихъ. |
| s-236
| И тыи добрыи люди рекли так: «Правда и есть, были есмо при том рѧду межи ихъ, ино давал Ѡлександро Евлашку четвѣртую долю оу том ѡзере оу Солонци, ино Евлашко не хотелъ, не брал» . |
| s-237
| И мы по тых добрых людеи людованью Евлашка есмо ѡправили и присудили есмо Евлашку оу том ѡзере оу Солонци долю, поколь Евлашкова землѧ пришла, потол(ь) ему оу том ѡзере оу Солонци ходити, и нороть при своем березе класти, и в порубежних речках ѡт своего перега ему норот(ь) класти, и где его землѧ пришла. |
| s-238
| А при том были боѧрѣ полоцкии: кн(ѧ)зь Федоръ Шахъ, пан Ѧцко Григорьевич, пан Микита Ѡплечуевъ, братъ Ѧцковъ Сенко Мокидернѧтич, Волфромѣи Шипило, Сенко Гридкович, Ѧцко Ходѡрович, а мѣстичов добрых людеи мног(о) было. |
| s-239
| А хто наш судъ сии рушить, велик[ому королю ви]ны дасть гривну золота. |
| s-240
| П(и)сал дьѧкъ панскии писарь на имѧ Те[шко]. |
| s-241
| + Ѡт пана Ондреева намѣстника, воевод(ы) полоцкого, пана Ивана, и ѡт бояръ полоцкых, и ѡт мѣстичовъ полоцкых, и ѡт всего посполства приятелем нашим милым, посадником ризкым и всим ратманом челобитье. |
| s-242
| Вьзьявлѧем вашеи м(и)л(о)сти, што ж кунтуръ невгискыи оубилъ нашег(о) полочанина, доброг(о) мѣстича на имѧ Грица. |
| s-243
| И ваша бы м(и)л(ос)ть послали до кн(ѧ)зѧ мештерѧ, штобы онъ того кунтура невгинского, того оубицу, держалъ твердо, докуль о том осп(о)д(а)рь нашь его м(и)л(о)сть король вьзвѣдает(ь) и панове рада осподарьская. |
| s-244
| За то бы ваша м(и)л(о)сть стояли твердо, ажбы промежю нами болшого смутку не было. |
| s-245
| Приятелем нашим милым, посадником ризкым и всимъ ратманомъ |
| s-246
| Се аз, рабъ Б(о)жіи Ивашко Полоупѧта Михаилович, далъ есми великомоу Іѡаноу Пр(е)дтечи оу Островъ сеножаткоу межоу дорогами Бобыницкою а Воронацкою верьхъ Савина рꙋчьѧ Желѣзковьскꙋю о(т)цю своемоу и м(ате)ри своеи на памѧт(ь). |
| s-247
| А при том былъ пана Ѡндрѣевъ намѣсник, воеводы полоцкого, Вежкгаило, а изь Витебска Мишко Володкович, а королевскыи соколникъ Еремеи, a вл(а)д(ы)чень пѣвец шꙋринъ, а слоуг пана Ѡндреевых Данило Волынець а Станишо Ескович. |
| s-248
| А писалъ попъ Иван, крылошанин С(вѧ)т(о)го Софеѧ, Глезнович. |
| s-249
| + Ѡт пана Андрѣева намѣстника полоцком, и ѡт бояръ полоцких, и ѡт мѣстичов полоцких. |
| s-250
| Издѣ бил нам чолом Санков с(ы)нъ Чюпринов Каръпко, што ж тот Санко завоеван был на С(вя)тои рецѣ оу Жомотъ. |
| s-251
| То пак и- Жомоти выбѣглъ с немчином. |
| s-252
| А пошол был к Полоцку на ѡтину. |
| s-253
| Ино, деи, пак, оу Невгини поимавше, попровадили, деи, к вам оу Ригу, а и тыи люди есть видели, как провадили. |
| s-254
| Про то ж пишом своим сусѣдом, штобы ес(те) того ч(о)л(о)в(е)ка пусти, занож ч(о)л(о)в(е)къ ѡсп(о)д(а)ря нашог(о) королев путныи ч(о)л(о)в(е)къ. |
| s-255
| Пак ли не пустите, ѡсп(о)д(а)рь пак наш оузвѣдает(ь) корол(ь), как за свое стоят(и). |
| s-256
| Сусѣдом нашим милым ратманом риским. |
| s-257
| + Приятелем нашим и сусѣдом ратманом ризскимъ |
| s-258
| Б(о)жьею м(и)л(о)стью и вѣликог(о) королѧ здоровьем. |
| s-259
| + + Ѡт мѣстичов полоцких и ѡт всѣго мьста Полоцкѡг(о) приятелѣмъ нашим, посадникоу ризкомꙋ и всим ратманом и мьстичомъ Ризкаг(о) мьста поклон. |
| s-260
| Ижь нашег(о) мьстича Пронка коупѣць съехал до васъ, а съ его товаромъ, на имѧ Тораско. |
| s-261
| И вы бъ, ваша м(и)л(о)сть, наши приятѣли, за того ч(о)лов(е)ка нѣ стояли, выдали бъ есте его и съ ег(о) товаром съ всимъ нашемоу мьстицю Пронкоу. |
| s-262
| Занже ваша м(и)л(о)сть вѣдаете сами, какъ в нас право стоит(ь) межи вас и нас, што истцю истца знати, а за виноватого нѣ стояти на ѡбѣ сторонѣ. |
| s-263
| А боудете ваша м(и)л(о)сть стояти за виноватца, и мы также вѣдаемъ, какъ свое ѡтнѧти. |
| s-264
| + Посадникоу ризкомоу и ратманомъ и всимъ мѣстичом Ризког(о) мѣста |
| s-265
| + От пана Андрѣя Саковича, воеводы полотског(о), приятелѣмъ нашим, ратманом Ризког(о) мѣста. |
| s-266
| Жаловался намъ тотъ мѣстич полотскии, слуга ѡсп(о)д(а)ря нашог(о) великог(о) короля, на имя Сергѣи Мошневич, што ж дал там оу Ризѣ оу стадо два коня паствити конюху вашомоу рискомоу. |
| s-267
| А коли захотел проч(ь) к Полоцку, ино тотъ конюхъ пастухъ привелъ к нему ѡдног(о) коня, а другого не привел. |
| s-268
| Ино тотъ Сергѣи жаловал вамъ на ратуши ѡчи на ѡчи и двоичикроть и с тым конюхом. |
| s-269
| Ино ваша м(и)л(о)сть тому нашому полочанину велѣли поехати к Полоцку, а коня тог(о) нялися естѣ ѡтискати, а толко не ѡтискати, ино ваша м(и)л(о)сть нялис(я) пенязи к немоу прислати к Полоцку, а пастоуха тог(о) оузяли естѣ на свои руки. |
| s-270
| Про то ж мы к вам пишом, штобы естѣ осп(о)д(а)ря нашог(о) местич(у) коня тог(о) верноули. |
| s-271
| А толко коня не будеть, ино ваша м(и)л(о)сть заплатитѣ емоу пенязи за тог(о) коня, што будеть его цена, яко жь естѣ сами емоу инялися. |
| s-272
| Пак ли не вернѣте коня, а любо пенязѣи не заплатитѣ, быхомъ не вѣлели ваших забавити здесѣ оу Полотскꙋ. |
| s-273
| + Приятелем нашим, ратманом Ризког(о)мѣста |
| s-274
| + Ѡт пана Ѡндрѣя Сакович(а), воеводы полоцког(о), приятелем нашим, ратманом Ризког(о) мѣста и всим мѣстичом поклон. |
| s-275
| Жаловался нам мѣстич полоцкии, слуга ѡсп(о)д(а)ря великог(о) короля на имя Пронко Тꙋпичинич, што ж был оу нѣго его торговчик и съ его пенязми еждивал торговывал, на имя Тараско. |
| s-276
| Н(ы)нѣ пак там к Ризѣ избеглъ, а там ѡселъ, а пенязи Пронковы оу нѣго вси. |
| s-277
| Про то ж мы к вам пишом, своим приятелем, как жо и сами ведаетѣ, што вам с Полоцком какии записи: полочанина оу Полоцку и судити, и казнити, хотя оу Ризѣ проступит(ь), а рижанина оу Ризѣ вамъ судити и казнити по своемꙋ право. |
| s-278
| Ино штобы естѣ тог(о) Тараска выдали Пронкꙋ и со всими его статки. |
| s-279
| Пак ли не выдастѣ, вы жь на нас хочѣте дивитѣ, a хочѣтѣ не дивитѣ, мы ваших рижан здесѣ оу Полоцкꙋ и трѣхъ забавим против тог(о). |
| s-280
| Приятелем нашим, ратманом Ризког(о) мѣста и ко всим мѣстичом ризкимъ |
| s-281
| + Ѡт мѣстичеи пололоцких кꙋпцевъ ратъманѡм рискым [п]ок[л]ѡ[н] и вѣрнаа признь. |
| s-282
| Не перьвое вам пишемь, что ж чините хвалшь в сꙋкнѣ, а в соли, а в селедцѣхъ. |
| s-283
| [И] вы нам в том не исправлѧетесѧ, и теперьво есмо послали к вам хвалшь в селедцѣхъ свою братью, и вы бы естѣ тѣхъ хвальшьников казнили по своемꙋ правꙋ свѣточно, а нашеи братьи вѣлѣли бы естѣ ихъ щкотꙋ заплатити. |
| s-284
| Заньже сами вы чините, хто приедеть к вам нашь с воском с лихим, и вы сѣмъ въеводѣ листы ѡписываетѣ, и воевода здесѣ въскъ ѡтнимаеть, a пѣнѧзьми казнит. |
| s-285
| А не въсхотите ли намъ исправитисѧ, а нашеи братьи не възвелите их щкоты заплатити, а потом намъ ѡт вас придет в чем хвальшь, мы к вам ѡт томъ фальши не бꙋдемь послати, оужь пошлем до милостиваг(о) королѧ. |
| s-286
| Ес(ть) оу нас ѡсподарь, комꙋ нас ѡборонити. |
| s-287
| + Ратьманѡм рискымъ |
| s-288
| + От пана Ондрѣѧ Сакович(а), воеводы полотског(о), приѧтелем нашим, паном ратманом ризким всим поклон и поздровѣнье. |
| s-289
| И пѣрво тог(о) жаловал нам тот нашь полочанин на имѧ Сѣргѣи Мошнѣвич, што ж там в Ризѣ дал был конѧ своего паствити оу стадо конюхом мѣстицким и наемъ заплатил. |
| s-290
| Ино конюхи тог(о) конѧ изгꙋбили. |
| s-291
| И тот Сергѣи жаловал вашои м(и)л(о)сти на рꙋтꙋши. |
| s-292
| И ваша м(и)л(о)сть инѧлисѧ заплатити тог(о) конѧ и с ратꙋша. |
| s-293
| И мы к вашои м(и)л(о)сти писали, штобы естѣ право вчинили: велели тог(о) конѧ заплатити. |
| s-294
| И дрꙋгоичикроть писали есмо, и вы не хотѣли ничог(о) права оучинити. |
| s-295
| Ино посмотритѣ тог(о), естли то добрѣ чинитѣ: не хочѣтѣ нашим права чинити на нашо прошѣнье. |
| s-296
| А мы здѣсѣ вашим купцом всим право чиним. |
| s-297
| Ино и н(ы)нѣ просим вас, ижбы естѣ велели тог(о) конѧ заплатити. |
| s-298
| Пак ли нѣ заплатитѣ, конѣчно велим здѣсѣ ваших купцов, правых людѣи, пограбити. |
| s-299
| А болши тог(о) не хочом вас о то просити и писати. |
| s-300
| А псан оу Полотскꙋ. |