| s-102
| A н(ы)нѣ было поехати нашемꙋ братоу к Новоугородоу. |
| s-103
| И мы, его ссадившо с великое дорогы, и послали его к вам на исправоу. |
| s-104
| И вы бы велели его щкотоу и его соромъ заплатити. |
| s-105
| А не заплѧтите, и енъ хочеть свое соромоты искати, занже нашь братъ братъ правъ, без вины его волочат(ь). |
| s-106
| И вы бы ѡ томъ росмотрели. |
| s-107
| А ѡ томъ быхомъ болшого клопотоу не драли. |
| s-108
| Посадникомъ и ратманомъ ризкимъ |
| s-109
| + Ѡт пана Василья Дмитреевича Корсака, и ѡт пана Олехна, наместника пана Ондреева, воеводы полоцкого, и ѡт всих бояръ полоцкых ратманѡм ризькым поклонъ и приятелство. |
| s-110
| Ѡ тѡм пишемь вам, помните вы сами, как вам было с нами докончаніе, што вам было оу нас оу Лоцкꙋ корчмы не держати, ни вина на розницю не продавати, а ни пива, ни меду. |
| s-111
| А про то есмѣ посылали к вам свои послы, на имѧ Федька Булавинича, а Фалел(ь)я Севрюковича, а Ѡльферіѧ Чернѧту. |
| s-112
| И вы нашими послы ѡтказали к нам свои речи: «Кого имете нашего немчина корчму продая, и вы его имѣтѣ и сошлетѣ к нам на низъ ѡковавше и съ его делы» . |
| s-113
| И мы еще после того, как есмѣ к вам посыли, досыть ваших детеи оунимали, штобы сѧ ѡни ѡт того оущунули, корчмы бы оу нас не держали. |
| s-114
| И ѡни нас не хотели слухать, ѡт того сѧ не оущоунили: как держали, так держали оу нас корчму. |
| s-115
| И мы оуже болши того не можем терпети. |
| s-116
| Оу вашего есмѣ немчина Аврамка корчму вынѧли. |
| s-117
| А также Захарка, немчинъ, пивноую корчму продаеть. |
| s-118
| И мы ваших немець послали к вам на низъ и съ ихъ делы. |
| s-119
| И вы бы ихъ про то казнили по их делом. |
| s-120
| А иных бы есте ѡт того оущували, штобы и потом оу нас оу Лоцкꙋ корчмы не д(е)ржали. |
| s-121
| Пак ли про то не имете их казнити, и нам оуже черес то к вам не слати, хотим сами казнити, какъ мы ведаем, а вам про то на нас не дивити. |
| s-122
| Занже заказали были есте своим торговцем к нам пива не возити. |
| s-123
| А повезоут(ь) пиво, и мы хотим сами бочкы их рассечи и въ Двину оумѣтати. |
| s-124
| + Паномъ ратманомъ рикимъ |
| s-125
| + Ѡт местичовъ полоцкых и ѡт всих мꙋж полочанъ ратманомъ ризким поклон и приятельство. |
| s-126
| О том пишемъ вамъ, помните вы сами, как вам было с нами докончание, што вамъ было оу нас оу Полоцкꙋ корчмы не держати, ни вина на розницю не продавати, а ни пива, ни медꙋ. |
| s-127
| Занже нам ѡт вас стало напасть оу тых корчмах с полтораста рꙋблевъ. |
| s-128
| И про то есмо послали к вамъ свои послы, на имѧ Федка Бꙋлавинич, а Фалелея Севрюковичь, а Ольферья Чернѧтоу. |
| s-129
| И вы нашими послы ѡтказали к нам свою реч(ь): «Кого имете нашого немчина, корчмꙋ продаа, и вы его сошлите к нам на низ оковавше и съ его дѣлы» . |
| s-130
| И мы ещо после того, как есмо к вам посылали, досыт(ь) ваших дѣтеи оунимали, штобь сѧ ѡни ѡт того оусчюноули, корчмы бы оу нас не держали. |
| s-131
| И они нас не хотели слꙋхать, ѡт того не оусчюнꙋли: как держали корчмꙋ оу нас, так держали. |
| s-132
| И мы оуже болши того не можем терпети. |
| s-133
| Оу вашего есмо немчина оу Аврамка корчмоу вынѧли. |
| s-134
| А также и Захарка, немчимъ, пивнꙋю корчмꙋ продаеть. |
| s-135
| И мы ваших немець послали к вам на низ и съ их дѣлы. |
| s-136
| И вы бых их про то казнили по их дѣлом. |
| s-137
| А и иных бы есте ѡт того оусчювали, штобы и потомъ оу нас оу Полоцкꙋ корчмы не держали. |
| s-138
| Пак ли про то не имете их казнити, и нам оуже черес то к вамъ не слати, хотимъ сами казнити, как мы вѣдаем, а вам про то на нас не дивити. |
| s-139
| А заказали бы есте своим торговцемъ, штобы и пива к нам не везли. |
| s-140
| А повезꙋть пиво, и мы хотимъ сами бочкы их рассѣчи и въ Двинꙋ оуметати. |
| s-141
| Паном ратманомъ ризкимъ |
| s-142
| + Ѡт пана Андреѧ, воеводы полоцког(о), приѧтѣлемъ нашимъ, паномъ ратъманомъ ризьскимъ. |
| s-143
| Послали есмо мѣстичовъ полоцкихъ Ивана Ворушина а Васильѧ Камъшикꙋви до Риги ѡ своихъ потрѣбахъ. |
| s-144
| Ино чого не добудуть оу Ризѣ, просимъ вас, своихъ приѧтелеи, штобы естѣ ихъ пропустил(и) и далѣи Риги. |
| s-145
| Приѧтѣлемъ нашимъ паномъ ратманомъ ризькимъ |
| s-146
| + Ѡт пана Анъдрѣева намѣсника полоцког(о) пана Ѡмельѧна, и ѡт боѧръ полоцкихъ, и ѡт мѣстичевъ полоцкихъ приѧтелем нашимъ ратьманом ризъким поклнъ и приѧзнь по всѧ часы. |
| s-147
| Про то к вам пишем, своимъ приѧтелем. |
| s-148
| Здѣсе вашь нѣмець оу нас оу Полоцку на имѧ Инъдрихъ скололъ ч(о)л(ове)чка нашег(о) полочанина. |
| s-149
| И мы послали поньског(о) слугу по него, с(ы)на боѧрьског(о), и ѡнъ и паньском(у) слузѣ порѣзал руки дѣкою. |
| s-150
| А сами вы вѣдаете, коли децкого бити, какаѧ то изъброднѧ великаѧ. |
| s-151
| Ино штобы есте велѣли ему паньскому слузѣ безъчестье заплатити, a и том(у) нашем(у) полочанину, которого скололъ. |
| s-152
| A здѣсе далъсѧ за поруку, што жь имаеть там стати передъ вами, передъ ратманы ризькими, за тою порукою. |
| s-153
| А мы его послали к вамъ. |
| s-154
| Ино штобы есте оу винѣ его казнили, какъ вы вѣдаете оу своемъ правѣ, а нашим велѣте безъчестье заплатити. |
| s-155
| Не въсхочете ль пак нашим безъч[ес]тьѧ заплатити, и мы за свое возмем. |
| s-156
| Да намъ бы есте тымъ же ѡтписали, хто ѡт насъ вамъ листъ нашь принесеть. |
| s-157
| + Ратъманомъ ризькым |
| s-158
| + Ѡт пана Андреева слуги, намѣстника полоцкго, ѡт пана Ѡмѣльѧна приѧтѣлѣмъ нашимъ, ратманомъ ризькимъ. |
| s-159
| Пишу вамъ ѡ то, што паньскии слуга Зубѣцъ пѣрво былъ збродилъ: ѡт пана побѣгъ к Чорторыискому, да ѡт Чорторыиского к вамъ поехалъ, да тамъ оу вашого мѣстѣра служилъ, да ѡт мѣстѣра ѡпѧть к пану приехалъ. |
| s-160
| Добрые луди, оуступивсѧ, да за нѣго бѣрие били чоломъ. |
| s-161
| Панъ былъ ему гнѣва ѡтпустилъ. |
| s-162
| И почалъ сѧ оу пана просити к Ризѣ ѡпѧть, a молачо такъ: «Панѣ, тамъ статъковъ дѣржу досить» . |
| s-163
| И панъ, ему повѣривъ, да ѡтпустилъ его и грамоты ему подовалъ до васъ, штобы вы ему статкы выправили. |
| s-164
| И ѡнъ, да тамъ к вамъ ехавши, да пѣрѣхстилъсѧ оу вашу вѣру. |
| s-165
| Ино мы вашо вѣрѣ нѣ пригонаемь. |
| s-166
| Ино того збродна Зубца выдаитѣ тому, хто вамъ сию грамоту принѣсѣть. |
| s-167
| A нѣ выдадитѣ ль, и вы его до пана блудѣтѣ, то пакъ мои ѡсподарь панъ оузвѣдаеть, какъ ѡ томъ ѡгадаеть. |
| s-168
| А мои два рубли вѣлитѣ ему ѡтослати. |
| s-169
| Нѣ ѡтошлѣть ли моихъ дву рублѣвъ, и ѧ здѣ вашого доброго рижанина порублу оу тыхъ дву рублѣхъ, занужь тие два рубли ѧ былъ на конъ послалъ. |
| s-170
| + Ѡт пана Андрѣѧ Саковича, воевод(ы) полоцког(о), приѧтелем нашим, ратманом Ризког(о) мѣста. |
| s-171
| Жаловал намъ тотъ мѣстичь полоцкии на имѧ Артѣмѣи Демѣхович, што ж виноватъ был вашому немчину рижанину Индрику берковоскъ воску без трех пудовъ и без пѧти гривенок. |
| s-172
| И поведаеть, што ж ѡтлезъ его чисто там оу Ризѣ. |
| s-173
| И ѡнъ пак не хочеть ему н(ы)нѣ ѡтдати записи его назадъ, што сѧ был ему записал, чимъ виноватъ. |
| s-174
| Ино штобы естѣ тому полочанину право оучинили, запись тую велитѣ вернути ему. |
| s-175
| Пак ли права тому Артѣму не вчинитѣ, и мы здесе вашим рижаном також не будемъ права чинити. |
| s-176
| А передъ вашим Гарманом жаловалсѧ намъ. |
| s-177
| Приѧтелем нашим, ратъманом Ризког(о) мѣста |
| s-178
| + Ѡт пан(а) Ондрѣева намѣсника, воеводы полоцьког(о). |
| s-179
| Здѣсе жаловал(и)сѧ наши люд(и), што их бьют(ь), колють. |
| s-180
| Ино вед(ь) сами вѣдаете, коли ваш нѣмьчин што избродит(ь), и мы к вам опишом, а сами не казним. |
| s-181
| А наш ч(о)л(ове)къ што оу вас избродит(ь), и вы к нам шлите, нехаи мы по своему праву ихъ судимь. |
| s-182
| И вы бы нашим людемъ дали право. |
| s-183
| А не хочете дати права, ино ваших нѣмець мног(о) здѣсе, и мы оу 10-ро имем ваших немець за шию, штобы противь нашог(о) стало. |
| s-184
| Приятелем нашим, ратманом, и суд(ь)ям, и мѣстичом. |
| s-185
| + Ѡт мѣстічовъ полоцкых и ѡт всег(о) поспол(ь)ства пріятелем нашим, посадником ризькым и ратманомъ поклон. |
| s-186
| Ѡ том вамъ, своим пріятемъ, пишемъ, што есте лѣтось ѡ Еване дні прізывали нашю брат(ь)ю на ратꙋшоу. |
| s-187
| Ино что боудоут(ь) наша брат(ь)ѧ перед вами говоріли на ратоуши, и вы бы то попамѣтовали и ѡтписали бы есте к нашемоу ѡспод(а)рю панꙋ Ѡндрею, воеводѣ полоцкомꙋ, и к намъ. |
| s-188
| А мы вам, своим пріятелем, чоломъ біемъ |
| s-189
| + Пріятем нашим, посадником ризкым и ратъманомъ |
| s-190
| + Почестнымъ мужомъ, приятелем нашим, ратманом рыским. |
| s-191
| Изде как приѣхал есмь оу Полотескъ, и купци кн(я)зя великого полочане били нам челом, a повѣдают(ь), што ж кн(я)зь вашь мештерь полочаном оу Ризе торговати не дал, а ещо и товаръ оу них пограбил, и суды ѡтоимал во кн(я)зя вашого мештереве земли, што пѣши пришли к Полоцку. |
| s-192
| Такую им соромоту оучинил. |
| s-193
| Ино не имъ соромоту оучинил — ѡсп(о)д(а)рю нашому кн(я)зю великом(у) соромоту чинит(ь). |
| s-194
| А вашим купцом ризским оу Полоцку доброволно торговати. |
| s-195
| И вы бы кн(ѧ)зю своему мештерю говорили, штобы кн(я)зя великого купцом полочаном товаръ их ѡтдал, а торговати бы дал, как издавна быва по старому. |
| s-196
| А не въсхочет ли ѡтдати, ино зде оу Полоцку ваших купцов полно, и мы против велим товаръ оу ваших забавит(и). |
| s-197
| А к нам бы есте отписали. |
| s-198
| А такжо оу Невгини оу полочан товаръ трясут(ь) а грябят(ь) и гличами поставы колут(ь). |
| s-199
| И вы бы и ѡ том кн(я)зю своему мештерю говорили. |
| s-200
| А к нам бы есте ѡтписали против нашои грамоты. |
| s-201
| А Гарман ваш нам на то слюбил и руку на том дал, што кн(я)зя великог(о) купьцом полочаном оу Ризе торговати доброволно, и за море пут(ь) ч(и)стъ, водою и сухим путем, как издавна бывало по старому. |