| s-301
| wairþ hrains |
| s-302
| jah suns þata þrutsfill aflaiþ af imma |
| s-303
| jah is faurbaud imma ei mann ni qeþi |
| s-304
| ak gagg jah ataugei þuk silban gudjin jah atbair imma fram þizai gahraineinai þeinai þatei anabaud Moses du weitwodiþai im |
| s-305
| usmernoda þan þata waurd mais bi ina jah garunnun hiuhmans managai hausjon jah leikinon fram imma sauhte seinaizo |
| s-306
| iþ is was afleiþands ana auþidos jah bidjands |
| s-307
| jah warþ in ainamma dage jah is was laisjands |
| s-308
| jah wesun sitandans Fareisaieis jah witodalaisarjos þaiei wesun gaqumanai us allamma haimo Galeilaias jah Iudaias jah Iairusaulwmon |
| s-309
| jah mahts fraujins was du hailjan ins |
| s-310
| jah sai mans bairandans ana ligra mannan saei was usliþa jah sokidedun ƕaiwa ina innatbereina jah galagidideina in andwairþja is |
| s-311
| jah ni bigitandans ƕaiwa innatbereina ina in manageins ussteigandans ana hrot and skaljos gasatidedun ina miþ þamma badja in midjaim faura Iesua |
| s-312
| jah gasaiƕands galaubein ize qaþ du þamma usliþin |
| s-313
| manna afleitanda þus frawaurhteis þeinos |
| s-314
| jah dugunnun þagkjan þai bokarjos jah Fareisaieis qiþandans |
| s-315
| ƕas ist sa saei rodeiþ naiteinins |
| s-316
| ƕas mag afletan frawaurhtins alja ains guþ |
| s-317
| ufkunnands þan Iesus mitonins ize andhafjands qaþ du im |
| s-318
| ƕa biþagkeiþ in hairtam izwaraim |
| s-319
| ƕaþar ist azetizo qiþan afletanda þus frawaurhteis þau qiþan urreis jah gagg |
| s-320
| aþþan ei witeid þatei waldufni habaid sa sunus mans ana airþai afletan frawaurhtins |
| s-321
| qaþ du þamma usliþin |
| s-322
| du þus qiþa |
| s-323
| urreis jah ushafjands þata badi þeinata gagg in gard þeinana |
| s-324
| jah sunsaiw usstandands in andwairþja ize ushafjands ana þammei lag galaiþ in gard seinana mikiljands guþ |
| s-325
| jah usfilmei dissat allans jah mikilidedun guþ jah fullai waurþun agisis qiþandans þatei |
| s-326
| gasaiƕam wulþaga himma daga |
| s-327
| jah afar þata usiddja jah gasaƕ motari namin Laiwwi sitandan ana motastada jah qaþ du imma |
| s-328
| laistei afar mis |
| s-329
| jah bileiþands allaim usstandands iddja afar imma |
| s-330
| jah gawaurhta dauht mikila Laiwweis imma in garda seinamma jah was managei motarje mikila jah anþaraize þaiei wesun miþ im anakumbjandans |
| s-331
| jah birodidedun bokarjos ize jah Fareisaieis du siponjam is qiþandans |
| s-332
| duƕe miþ þaim motarjam jah frawaurhtaim matjid jah drigkid |
| s-333
| jah andhafjands Iesus qaþ du im |
| s-334
| ni þaurbun hailai leikeis ak þai unhailans |
| s-335
| ni qam laþon garaihtans ak frawaurhtans in idreiga |
| s-336
| iþ eis qeþun du imma |
| s-337
| duƕe siponjos Iohannes fastand ufta jah bidos taujand samaleiko jah Fareisaiei iþ þai þeinai siponjos matjand jah drigkand |
| s-338
| ni magud sununs bruþfadis unte sa bruþfads miþ im ist gataujan fastan |
| s-339
| aþþan qimand dagos jah þan afnimada af im sa bruþfads jah þan fastand in jainaim dagam |
| s-340
| qaþ uh þan jah gajukon du im þatei |
| s-341
| ainshun plat snagins niujis ni lagjid ana snagan fairnjana |
| s-342
| aiþþau jah sa niuja aftaurnid jah þamma fairnjin ni gatimid þata af þamma niujin |
| s-343
| jah ainshun ni giutid wein niujata in balgins fairnjans |
| s-344
| aiþþau distairid þata niujo wein þans balgins jah silbo usgutniþ jah þai balgeis fraqistnand |
| s-345
| ak wein juggata in balgins niujans giutand jah bajoþs gafastanda |
| s-346
| jah ainshun drigkandane fairni ni suns wili jugg |
| s-347
| qiþiþ auk |
| s-348
| þata fairnjo batizo ist |
| s-349
| Gahaitands þan þans twalif apaustauluns atgaf im maht jah waldufni ufar allaim unhulþom jah sauhtins gahailjan |
| s-350
| jah insandida ins merjan þiudangardja gudis jah gahailjan allans þans unhailans |
| s-351
| jah qaþ du im |
| s-352
| ni waiht nimaiþ in wig nih waluns nih matibalg nih hlaib nih skattans |
| s-353
| nih þan tweihnos paidos haban |
| s-354
| jah in þanei gard gaggaiþ þar saljiþ jah þaþroh usgaggaiþ |
| s-355
| jah swa managai swe ni andnimaina izwis usgaggandans us þizai baurg jainai jah mulda af fotum izwaraim afhrisjaiþ du weitwodiþai ana ins |
| s-356
| usgaggandans þan þairhiddjedun and haimos wailamerjandans jah leikinondans and all |
| s-357
| gahausida þan Herodis sa taitrarkes þo waurþanona fram imma alla jah þahta unte qeþun sumai þatei Iohannes urrais us dauþaim sumai þan qeþun þatei Helias ataugida sik sumai uþ þan þatei praufetus sums þize airizane usstoþ |
| s-358
| jah qaþ Herodes |
| s-359
| Iohannau ik haubiþ afmaimait iþ ƕas ist sa bi þanei ik hausja swaleik |
| s-360
| jah sokida ina gasaiƕan |
| s-361
| jah gawandjandans sik apaustauleis usspillodedun imma swa filu swe gatawidedun |
| s-362
| jah andnimands ins afiddja sundro ana staþ auþjana baurgs namnidaizos Baidsaiïdan |
| s-363
| iþ þos manageins finþandeins laistidedun afar imma jah andnimands ins rodida du im þo bi þiudangardja gudis jah þans þarbans leikinassaus gahailida |
| s-364
| þanuh dags juþan dugann hneiwan |
| s-365
| atgaggandans þan du imma þai twalif qeþun du imma |
| s-366
| fralet þo managein ei galeiþandans in þos bisunjane haimos jah weihsa saljaina jah bugjaina sis matins unte her in auþjamma stada sium |
| s-367
| þanuh qaþ du im |
| s-368
| gibiþ im jus matjan |
| s-369
| iþ eis qeþun du imma |
| s-370
| nist hindar uns maizo fimf hlaibam jah fiskos twai niba þau þatei weis gaggandans bugjaima allai þizai manaseidai matins |
| s-371
| wesun auk swe fimf þusundjos waire |
| s-372
| qaþ þan du siponjam seinaim |
| s-373
| gawaurkeiþ im anakumbjan kubituns ana ƕarjanoh fimf tiguns |
| s-374
| jah gatawidedun swa jah gatawidedun anakumbjan allans |
| s-375
| nimands þan þans fimf hlaibans jah twans fiskans insaiƕands du himina gaþiuþida ins jah gabrak jah gaf siponjam du faurlagjan þizai managein |
| s-376
| jah matidedun jah sadai waurþun allai |
| s-377
| jah ushafan warþ þatei aflifnoda im gabruko tainjons twalif |
| s-378
| jah warþ miþþanei was is bidjands sundro gamotidedun imma siponjos is jah frah ins qiþands |
| s-379
| ƕana mik qiþand wisan þos manageins |
| s-380
| iþ eis andhafjandans qeþun |
| s-381
| Iohannen þana daupjand anþarai þan Heleian sumai þan þatei praufetus sums þize airizane usstoþ |
| s-382
| qaþ þan du im |
| s-383
| aþþan jus ƕana mik qiþiþ wisan |
| s-384
| andhafjands þan Paitrus qaþ |
| s-385
| þu is Xristus sunus gudis |
| s-386
| iþ is þan gaƕotjands im faurbauþ ei mann ni qiþeina þata qiþands þatei skal sunus mans manag winnan jah uskusans fram sinistam wairþan jah gudjam jah bokarjam jah usqiman jah þridjin daga urreisan |
| s-387
| qaþ þan du allaim |
| s-388
| jabai ƕas wili afar mis gaggan afaikai sik silban jah nimai galgan seinana dag ƕanoh jah laistjai mik |
| s-389
| saei allis wili saiwala seina nasjan fraqisteiþ izai |
| s-390
| aþþan saei fraqisteiþ saiwalai seinai in meina ganasjiþ þo |
| s-391
| ƕo allis þaurfte gataujiþ sis manna gageigands þo manased alla iþ sis silbin fraqistjands aiþþau gasleiþjands |
| s-392
| saei allis skamaiþ sik meina aiþþau meinaize waurde þizuh sunus mans skamaid sik biþe qimiþ in wulþu seinamma jah attins jah þize weihane aggele |
| s-393
| qiþ uh þan izwis sunja |
| s-394
| sind sumai þize her standandane þaiei ni kausjand dauþau unte gasaiƕand þiudinassau gudis |
| s-395
| waurþun þan afar þo waurda swe dagos ahtau ganimands Paitru jah Iakobu jah Iohannen usiddja in fairguni bidjan |
| s-396
| jah warþ miþþanei baþ is siuns andwairþjis is anþara jah gawaseins is ƕeita skeinandei |
| s-397
| jah sai wairos twai miþrodidedun imma þaiei wesun Moses jah Helias |
| s-398
| þai gasaiƕanans in wulþau qeþun urruns is þoei skulda usfulljan in Iairusalem |
| s-399
| iþ Paitrus jah þai miþ imma wesun kauridai slepa |
| s-400
| gawaknandans þan gaseƕun wulþu is jah þans twans wairans þans miþstandandans imma |