Universal Dependencies - Classical_Armenian - CAVaL

s-1

MATT_3.1-3

Յաւուրս յայնոսիկ գայ Յովհաննէս մկրտիչ քարոզել յանապատին Հրէաստանի եւ ասել՝ ապաշխարեցէք զի մերձեալ է արքայութիւն երկնից: Զի սա է վասն որոյ ասացաւ ի ձեռն Էսայայ մարգարէի որ ասէ՝ ձայն բարբառոյ յանապատի՝ պատրաստ արարէք զճանապարհ Տեառն՝ եւ ուղիղ արարէք զշաւիղս նորա:

s-2

MATT_3.4

Եւ ինքն Յովհաննէս ունէր հանդերձ ի ստեւո ուղտու, եւ գաւտի մաշկեղէն ընդ մէջ իւր՝ եւ կերակուր նորա էր մարախ եւ մեղր վայրենի:

s-3

MATT_3.5-6

Յայնժամ ելանեին առ նա ամենայն Երուսաղէմացիք՝ եւ ամենայն Հրէաստան՝ եւ ամենայն կողմն Յորդանանու, մկրտեին ի նմանէ ի Յորդանան եւ խոստովան լինեին զմեղս իւրեանց:

s-4

MATT_3.7

Եւ տեսեալ զբազումս ի Սադուկեցւոցն եւ ի Փարիսեցւոց եկեալս ի մկրտութիւնն նորա, ասէ ցնոսա՝ ծնունդք իժից, ո՞ ցոյց ձեզ փախչել ի բարկութենէն որ գալոցն է:

s-5

MATT_3.8-9a

Արարէք այսուհետեւ պտուղ արժանի ապաշխարութեան, եւ մի համարիցիք ասել յանձինս թե ունիմք մեք հայր զԱբրահամ,

s-6

MATT_3.9a-10a

ասեմ ձեզ՝ զի կարող է Աստուած ի քարանց յայսցանէ յարուցանել որդիս Աբրահամու: Զի աւասիկ տապար առ արմին ծառոց դնի՝

s-7

MATT_3.10b

ամենայն ծառ որ ոչ առնիցէ զպտուղ բարի. հատանի եւ ի հուր արկանի՝

s-8

MATT_3.11a

Ես մկրտեմ զձեզ ջրով յապաշխարութիւն՝ բայց որ զկնին իմ գայ հզաւրագոյն է քան զիս, եւ ես չեմ բաւական բառնալ զկաւշիկս նորա,

s-9

MATT_3.11b

նա մկրտեսցէ զձեզ ի հոգին սուրբ եւ ի հուր՝

s-10

MATT_3.12

Որո հեծանոցն ի ձեռին իւրում, եւ սրբեսցէ զկալ իւր. եւ ժողովեսցէ զցորեանն ի շտեմարանս իւր, եւ զյարդն այրեսցէ անշէջ հրով:

s-11

MATT_3.13

Յայնժամ գայ Յիսուս ի Գաղիղեէ ի Յորդանան առ Յովհաննէս մկրտել ի նմանէ:

s-12

MATT_3.14

Եւ Յովհաննէս արգելոյր զնա եւ ասէ՝ ինձ պիտո է ի քէն մկրտել, եւ դու առ ի՞ս գաս:

s-13

MATT_3.15

Պատասխանի ետ Յիսուս եւ ասէ ցնա՝ թոյլ տուր այժմ. զի այսպէս վայել է մեզ լնուլ զամենայն արդարութիւն՝ եւ ապա թոյլ ետ նմա:

s-14

MATT_3.16a

Եւ իբրեւ մկրտեցաւ Յիսուս ել վաղվաղակի ի ջրոյ անտի՝

s-15

MATT_3.16b

եւ ահա բացան նմա երկինք. եւ ետես զհոգին Աստուածոյ զի իջանէր իբրեւ զաղաւնի եւ գայր ի վերայ նորա:

s-16

MATT_3.17

Եւ ահա ձայն յերկնից որ ասէր, դա է որդի իմ սիրելի. ընդ որ հաճեցա:

s-17

MATT_4.1

Յայնժամ վարեցաւ Յիսուս յանապատ ի հոգւոյն՝ փորձել ի սատանայէ:

s-18

MATT_4.2

Եւ պահեալ զքառասուն տիւ եւ զքառասուն գիշեր. ապա քաղցեաւ

s-19

MATT_4.3

Եւ մատուցեալ փորձիչն ասէ ցնա՝ եթե որդի ես Աստուածոյ. ասա զի քարինքս այսոքիկ հաց լինիցին:

s-20

MATT_4.4

Նա պատասխանի ետ եւ ասէ՝ գրեալ է, թե ոչ հացիւ միայն կեցցէ մարդ այլ ամենայն բանիւ որ ելանէ ի բերանոյ Աստուածոյ:

s-21

MATT_4.5-6

Յայնժամ առեալ ածէ զնա սատանա ի քաղաքն սուրբ, եւ կացուցանէ զնա ի վերայ աշտարակի տաճարին, եւ ասէ ցնա՝ եթե որդի ես Աստուածոյ. արկ զքեզ աստի ի վայր. զի գրեալ է՝ թե հրեշտեկաց իւրոց պատուիրեալ է վասն քո՝ եւ ի վերայ ձեռաց բարձցեն զքեզ, զի մի երբեք հարցես զքարի զոտն քո:

s-22

MATT_4.7

Ասէ ցնա դարձեալ Յիսուս՝ գրեալ է, թե ոչ փորձեսցես զՏէր Աստուած քո:

s-23

MATT_4.8-9

Դարձեալ առնու ածէ զնա սատանայ ի լեառն մի բարձր յոյժ, եւ ցուցանէ նմա զամենայն թագաւորութիւնս աշխարհի. եւ զփառս նոցա եւ ասէ ցնա՝ զայս ամենայն քեզ տաց, եթե անկեալ երկիր պագանիցես ինձ:

s-24

MATT_4.10

Յայնժամ ասէ ցնա Յիսուս՝ երթ յետս իմ սատանայ, զի գրեալ է, Տեառն Աստուածոյ քում երկիր պագցես, եւ զնա միայն պաշտեսցես:

s-25

MATT_4.11

Ապա եթող զնա սատանա. եւ ահա հրեշտակք մատեան եւ պաշտեին զնա:

s-26

MATT_4.12

Եւ իբրեւ լուաւ Յիսուս՝ եթե Յոհաննէս մատնեցաւ. մեկնեցաւ գնաց ի Գաղիղեա:

s-27

MATT_4.13-16

Եւ թողեալ զՆազարեթ եկն բնակեցաւ ի Կափառնաում ի ծովեզերին՝ ի սահմանս Զաբուղովնի եւ Նեփթաղիմայ: Զի լցցի բանն որ ասացաւ ի ձեռն Էսայայ մարգարէի՝ երկիր Զաբուղովնի եւ երկիր Նեփթաղիմայ, ճանապարհ ծովու յայնկոյս Յորդանանու՝ Գաղիղէա հեթանոսաց՝ ժողովուրդ որ նստէր ի խաւարի. ետես լոյս մեծ՝ եւ որոց նստեին յաշխարհին եւ ստուերս մահու, լոյս ծագեաց նոցա:

s-28

MATT_4.17

Յայնմ հետէ սկսաւ քարոզել Յիսուս եւ ասել, ապաշխարեցէք՝ զի մերձեալ է արքայութիւն երկնից:

s-29

MATT_4.18

Մինչդեռ զգնայր Յիսուս ընդ եզր ծովուն Գաղիղեացւոց, ետես երկուս եղբարս՝ զՍիմովն զկոչեցեալ Պետրոս եւ զԱնդրեաս եղբայր նորա արկեալ ուռկան ի ծով, քանզի ձկնորսք եին:

s-30

MATT_4.19

Եւ ասէ ցնոսա՝ եկայք զկնի իմ. եւ արարից զձեզ որսւորդս մարդկան:

s-31

MATT_4.20

Եւ նոքա թողեալ վաղվաղակի զգործիսն. գնացին զհետ նորա:

s-32

MATT_4.21

Եւ մատուցեալ անտի յառաջ. ետես այղ երկուս եղբարս, զՅակովբոս Զեբեդեայ եւ զՅովհաննէս եղբայր նորա, ի նաւի Զեբեդեաւ հանդերձ հարբն իւրեանց մինչդեռ կազմեին զուռկանս իւրեանց. եւ կոչեաց զնոսա:

s-33

MATT_4.22

Նոցա թողեալ վաղվաղակի զնաւն եւ զհայր իւրեանց. գնացին զհետ նորա:

s-34

MATT_4.23

Եւ շրջէր ընդ ամենայն կողմն Գաղիղեացւոց, ուսուցանէր ի ժողովուրդս նոցա՝ եւ քարոզէր զաւետարանն արքայութեան. եւ բժշկէր զամենայն հիւանդութիւնս եւ զամենայն ախտս ի ժողովրդեանն:

s-35

MATT_4.24a

Եւ ել լուրն նորա ընդ ամենայն երկիրն Ասորւոց.

s-36

MATT_4.24b

եւ մատուցին առ նա զամենայն հիւանդս. որ նեղեալ եին ի պէսպէս ցաւս եւ ի տանջանս, եւ զդեւահարս, եւ զլուսնոտս, եւ զանդամալոյծս, եւ բժշկեաց զնոսա:

s-37

MATT_4.25

Եւ երթային զհետ նորա ժողովուրդք բազումք ի Գաղիղեէ. եւ ի Դեկապողեայ. եւ յԷրուսալէմէ, եւ ի Հրէաստանէ, եւ յայնկոյս Յորդանանու, եւ բժշկեաց զնոսա:

s-38

MATT_5.1a

Եւ տեսեալ զժողովուրդսն, ել ի լեառն՝

s-39

MATT_5.1b

եւ իբրեւ նստաւ անդ մատեան առ նա աշակերտքն նորա:

s-40

MATT_5.2-3

Եւ բացեալ զբերան իւր ուսուցանէր զնոսա եւ ասէր: Երանի աղքատաց հոգւով, զի նոցա է արքայութիւն երկնից:

s-41

MATT_5.4

Երանի սգաւորաց, զի նոքա մխիթարեսցին:

s-42

MATT_5.5

Երանի հեզոց, զի նոքա ժառանգեսցեն զերկիր:

s-43

MATT_5.6

Երանի որ քաղցեալ եւ ծարաւի իցեն արդարութեան. զի նոքա յագեսցին:

s-44

MATT_5.7

Երանի ողորմածաց, զի նոքա ողորմութիւն գտցեն:

s-45

MATT_5.8

Երանի այնոցիկ որ սուրբ են սրտիւք, զի նոքա զԱստուած տեսցեն:

s-46

MATT_5.9

Երանի խաղաղարարաց, զի նոքա որդիք Աստուածոյ կոչեսցին:

s-47

MATT_5.10

Երանի որ հալածեալ իցեն վասն արդարութեան՝ զի նոցա է արքայութիւն երկնից:

s-48

MATT_5.11-12a

Երանի է ձեզ յորժամ նախատիցեն զձեզ եւ հալածեսցեն եւ ասիցեն զամենայն բան չար զձէնջ սուտ՝ վասն իմ:

s-49

MATT_5.12b

ցնծացէք եւ ուրախ լերուք, զի վարձք ձեր բազում են յերկինս, զի այսպէս հալածեցին զմարգարէսն որ յառաջ քան զձեզ եին:

s-50

MATT_5.13a

Դուք էք աղ երկրի,

s-51

MATT_5.13b

ապա եթե աղն անհամի. ի՞ւ յաղիցի

s-52

MATT_5.13c

ոչ իմիք ազդիցէ այնուհետեւ. բայց եթե ընկենուլ արտաքս եւ կոխան լինել ի մարդկանէ:

s-53

MATT_5.14a

Դուք էք լոյս աշխարհի,

s-54

MATT_5.14b

ոչ կարէ քաղաք թաքչել որ ի վերայ լերին կայցէ՝

s-55

MATT_5.15-16a

եւ ոչ լուցանեն ճրագ եւ դնեն ընդ գրուանաւ, այղ ի վերայ աշտանակի՝ եւ լոյս տա ամենեցուն որ ի տանն իցեն՝

s-56

MATT_5.16b

այնպէս լուսաւորեսցէ լոյս ձեր առաջի մարդկան, որպէս զի տեսցեն զգործս ձեր բարիս, եւ փառաւորեսցեն զհայր ձեր որ յերկինս է:

s-57

MATT_5.17

Մի համարիք եթե եկի լուծանել զաւրէնս կամ զմարգարէս, այղ լնուլ:

s-58

MATT_5.18

Ամէն ամէն ասեմ ձեզ՝ մինչեւ անցցեն երկինք եւ երկիր, յովտ մի որ նշանախեց մի է, ոչ անցցէ յաւրինացն եւ ի մարգարէից մինչեւ ամենայն եղիցի:

s-59

MATT_5.19a

Որ ոք լուծցէ մի ինչ ի պատուիրանաց յայսցանէ ի փոքունց՝ եւ ուսուսցէ այնպէս զմարդիկ. փոքր կոչեսցի յարքայութեան երկնից,

s-60

MATT_5.19b

իսկ որ արասցէ եւ ուսուսցէ. նա մեծ կոչեսցի յարքայութեան երկնից:

s-61

MATT_5.20

Բայց ասեմ ձեզ՝ զի եթե ոչ առաւելուցու արդարութիւն ձեր աւելի քան զդպրացն եւ զՓարիսեցւոց, ոչ մտանիցէք յարքայութիւն երկնից:

s-62

MATT_5.21

Լուարուք զի ասացաւ առաջնոցն թե մի սպանաներ՝ զի որ սպանանիցէ. պարտական լիցի դատաստանի՝

s-63

MATT_5.22a

Այղ ես ասեմ ձեզ՝ եթե ամենայն որ բարկանայ եղբաւր իւրում տարապարտուց. պարտաւոր լիցի դատաստանի:

s-64

MATT_5.22b

Եւ որ ասիցէ ցեղբայր իւր յիմար. պարտաւոր լիցի ատենի:

s-65

MATT_5.22c

Եւ որ ասիցէ ցեղբայր իւր մորոս. պարտաւոր լիցի ի գեհեն հրոյն:

s-66

MATT_5.23-24

Եթե մատուցանիցես զպատարագ քո ի վերայ սեղանոյ՝ եւ անդ յիշիցես թե եղբայր քո ունիցի ինչ խէթ զքէն. թող զպատարագն քո առաջի սեղանոյն՝ երթ նախ հաշտեաց ընդ եղբաւր քում. եւ ապա եկեալ մատուսջիր զպատարագն քո:

s-67

MATT_5.25-26a

Լեր իրաւախորհ ընդ աւսոխի քում վաղգոյն, մինչդեռ իցես ընդ նմա ի ճանապարհի՝ գուցէ մատնիցէ զքեզ աւսոխն դատաւորին՝ եւ դատաւորն դահճի. եւ արկանիցիս ի բանդ,

s-68

MATT_5.26b

ամէն ասեմ քեզ՝ ոչ ելանիցես անտի. մինչեւ հատուցանիցես զյետին նաքարակիտն:

s-69

MATT_5.27-28a

Լուարո՞ւք զի ասացաւ մի շնար,

s-70

MATT_5.28b

բայց ես ասեմ ձեզ՝ թե ամենայն որ հայի ի կին մարդ առ ի ցանկանալոյ նմա, անդէն շնացաւ ընդ նմա ի սրտի իւրում:

s-71

MATT_5.29

Եթե ակն քո աջ գայթագղեցուցանէ զքեզ, խլեա զնա եւ ընկեա ի քէն, զի լաւ է քեզ եթե մի յանդամոց քոց կորիցէ, եւ մի ամենայն մարմինդ քո անկանիցի ի գեհեն:

s-72

MATT_5.30

Եւ եթե աջ ձեռն քո գայթագղեցուցանէ զքեզ հատ զնա եւ ընկեա ի քէն՝ զի լաւ է քեզ եթե մի յանդամոց քոց կորիցէ, եւ մի ամենայն մարմինդ քո արկանիցի ի գեհեն:

s-73

MATT_5.31

Ապաքէն ասացաւ թե որ արձակիցէ զկին իւր. տացէ նմա զարձակմանն:

s-74

MATT_5.32

Բայց ես ասեմ ձեզ՝ եթե ամենայն որ արձակէ զկին իւր առանց բանի պոռնկութեան. նա տայ նմա շնալ՝ եւ որ զարձակեալն առնէ շնայ:

s-75

MATT_5.33

Դարձեալ լուարուք զի ասացաւ առաջնոցն մի երդնուցուս սուտ՝ բայց հատուսցես Տեառն զերդմունս քո:

s-76

MATT_5.34-36

Այղ ես ասեմ ձեզ՝ ամենեւին մի երդնուլ՝ մի յերկինս, զի աթոռ է Աստուածոյ՝ Եւ մի յերկիր. զի պատուանդան է ոտից նորա, եւ մի յԷրուսաղեմ, զի քաղաք է մեծի արքայի՝ եւ մի ի գլուխ քո երդնուցուս. զի ոչ կարես մազ մի սպիտակ առնել կամ թուխ:

s-77

MATT_5.37

Այղ եղիցի ձեր բան, այոն. այո, եւ ոչն. ոչ, զի աւելին քան զայն ի չարէն է:

s-78

MATT_5.38

Լուարուք զի ասացաւ, ակն ընդ ական՝ եւ ատամն ընդ ատաման:

s-79

MATT_5.39a

Այղ ես ասեմ ձեզ, մի կալ հակառակ չարի:

s-80

MATT_5.39b

Այղ եթե ոք ածիցէ ապտակ յաջ ծնաւտ քո, դարձո նմա եւ զմիւսն:

s-81

MATT_5.40

Եւ որ կամիցի ոք դատել եւ առնուլ զշապիկս քո, թող ի նա եւ զբաճկոն քո:

s-82

MATT_5.41

Եւ որ տարապարհակ վարիցէ զքեզ մղիոն մի, երթ ընդ նմա եւ երկուս՝

s-83

MATT_5.42

որում խնդրէ ի քէն տուր. եւ որ կամի փոխ առնուլ ի քէն մի դարձուցաներ զերեսս:

s-84

MATT_5.43

Լուարուք ապաքէն զի ասացաւ սիրեսցես զնկեր քո, եւ ատեսցես զթշնամին քո:

s-85

MATT_5.44-46a

Այղ ես ասեմ ձեզ՝ սիրեցէք զթշնամիս ձեր, աւհրնեցէք զանիծիչս ձեր՝ բարի արարէք ատելեաց ձերոց. եւ աղաւթս ի վերայ այնոցիկ որ լլկեն զձեզ եւ հալածեն՝ զի եղիջիք որդիք հաւր ձերոյ որ յերկինսն է՝ զի զարեգակն իւր ծագէ ի վերայ չարաց եւ բարեաց՝ եւ ածէ անձրեւ ի վերայ արդարոց եւ մեղաւորաց: Զի եթե սիրիցէք զայնոսիկ որ սիրեն զձեզ, զի՞նչ վարձք իցեն

s-86

MATT_5.46b

ոչ ապաքէն եւ մաքսաւորք զնոյն գործեն

s-87

MATT_5.47a

Եւ եթե տայցէք միայն ողջոյն բարեկամաց ձերոց, զի՞նչ աւելի առնէք

s-88

MATT_5.47b

ոչ ապաքէն մաքսաւորք եւ մեղաւորք զնոյն գործեն

s-89

MATT_5.48

Արդ եղերուք դուք կատարեալք, որպէս եւ հայրն ձեր երկնաւոր կատարեալ է:

s-90

MARK_4.1a

Եւ սկսաւ ուսուցանել առ ծովեզերբն՝

s-91

MARK_4.1b

եւ խռնեցան զնովաւ ժողովուրդք բազումք. մինչեւ ի նաւ մտանել նմա եւ նստել ի ծովուն՝ եւ ամենայն ժողովուրդքն զծովեզերբն զցամաքն ունեին՝

s-92

MARK_4.2-3

եւ ուսուցանէր զնոսա առակաւք բազում ինչ: Եւ ասէր նոցա ի վարդապետութեան իւրում: Լսէք՝ ահաւասիկ ել սերմանաւղ սերմանել՝

s-93

MARK_4.4

եւ եղեւ ի սերմանելն. ոմն անկաւ առ ճանապարհաւ եւ եկն թռչուն եւ եկեր զնա:

s-94

MARK_4.5-6a

Եւ այլն անկաւ յապառաժի ուր ոչ գոյր հող բազում. եւ վաղվաղակի բուսաւ քանզի ոչ գոյր հիւթ երկրին՝

s-95

MARK_4.6b

եւ յորժամ ծագեաց արեւ ջեռաւ՝ եւ զի ոչ գոյին արմատք. ցամակեցաւ:

s-96

MARK_4.7

Եւ այլն անկաւ ի մէջ փշոց, ելին փուշքն եւ հեղջուցին զնա՝ եւ պտուղ ոչ ետ:

s-97

MARK_4.8

Եւ այլն անկաւ յերկիր բարւոք. եւ ելեալ աճեցեալ տայր պտուղ՝ եւ բերէր. ընդ միոյ հարիւր:

s-98

MARK_4.9

Եւ ասէր՝ որ ունիցի ականջս լսելոյ. լուիցէ:

s-99

MARK_4.10

Եւ իբրեւ եղեւ առանձինն. հարցին ցնա որ զնովաւն եին աշակերտաւքն հանդերձ զառակսն:

s-100

MARK_4.11a

Եւ ասէ ցնոսա՝ ձեզ տուեալ է գիտել զխորհուրդս արքայութեան Աստուածոյ: