| s-305
| а сомомѹ и людемъ твоимъ ѿнюд никово ни в чемъ не ѡбидѣти ни в пашне ни в земле ни в домашнемъ ни в какомъ запасе ни в животине |
| s-306
| и всѧкаго неправеднаго стѧжанїѧ не желати |
| s-307
| бл҃гословлеными плоды и праведнымъ стѧжанїемъ жити подобаетъ всѧкомѹ хрстїѧнинѹ |
| s-308
| и млстнѧ та ѿ праведных трѹдовъ и бг҃ѹ прїѧтна |
| s-309
| и мл҃итвѹ ихъ бг҃ъ оуслышит и ѿ грѣховъ свободит и жизнь вѣчьнѹю дарѹетъ |
| s-310
| ѡ изоѡбилованїи потребных |
| s-311
| понеже ѹбо исперва егда начинаше сѧ с꙽троити мѣсто то тогда многи недостаткы бывахѹ |
| s-312
| лишенїе всѣх потребных послѣднѧго ради нестѧжанїѧ и конечнѧѧ дѣлѧ пѹстоты еже не имѣти имъ ниѿкѹдꙋ же всѧкого ѹтѣшенїѧ но и прочїѧ всѧкїѧ нѹжныѧ потребы |
| s-313
| ѿкѹдꙋ бо имѣти хотѧхѹ кое любо потребованїе |
| s-314
| елма ж пѹсто бѧше мѣсто то и не бѣ тогда окрстъ мѣста того ни селъ близ ни дворовъ |
| s-315
| по мнѡга ж времена и пѹти прос꙽тран꙽наго не бѧше к мѣстѹ томꙋ но нѣкоею ѹзскою и прискоръбною тѣсною стезею аки беспѹтїем нѹжахѹ сѧ приходити к ним |
| s-316
| великїи ж и широкїи пѹть вселюдскїи ѿдалече не приближаѧ сѧ мѣста того ведѧше сѧ |
| s-317
| ѡкрстъ же манастырѧ того все пѹсто |
| s-318
| со всѧ с꙽траны лѣсове |
| s-319
| всюдꙋ пѹстынѧ |
| s-320
| пѹстыни в рѣснотѹ нарицаше сѧ |
| s-321
| и сице жив꙽шимъ имъ дон꙽деже исполниша сѧ д҃нїе лѣт ꙗко мню множае пѧти на десѧти |
| s-322
| паки же по дн҃ехъ не п꙽щѹю ꙗко во д҃нех кнѧженїѧ кнѧѕѧ великого івана сн҃а иванѧ брата же симеѡнѧ тогда начаша приходити хрстїѧне и обходити с꙽квоѕѣ всѧ лѣсы ѡны |
| s-323
| и возлюбиша жити тѹ |
| s-324
| и мнѡжес꙽тво людїи восхотѣв꙽ше начаша со ѡба полы мѣста того садити сѧ |
| s-325
| и начаша сѣщи лѣсы ѡны ꙗко никомѹже возбранѧющѹ имъ |
| s-326
| и сотвориша себѣ различныѧ мнѡгиѧ почин꙽цы |
| s-327
| преждереченнѹю исказиша пꙋстыню |
| s-328
| не пощадѣша |
| s-329
| и сотвориша пꙋстыню ꙗко полѧ чиста мнѡга ꙗкож и н҃нѣ нами зрима сѹть |
| s-330
| и составиша села и дворы мнѡги |
| s-331
| и насѣѧша села и сотвориша плѡд житенъ и ѹмножиша сѧ ѕелѡ |
| s-332
| и начаша посѣщати и ѹчащати в꙽ манастырь приносѧще мнѡгоѡбразнаѧ и мнѡгоразличнаѧ потребованїѧ имже нѣсть числа |
| s-333
| но мы до здѣ сїю рѣчь оставльше а на предреченнѹю бесѣдꙋ обратим꙽ сѧ еже ѿ начат꙽ка слова начах повѣдовати ѡ всѧцѣи хѹдости и ѡ недостатъцѣхъ нꙋжныхъ потребъ без них꙽же не мощно ѡбрѣсти сѧ |
| s-334
| егда исперва начинаше сѧ создавати сѧ мѣсто то егда не мнѡжаишим братїѧмъ живꙋщимъ в немъ егда немнѡѕи бѧхѹ приходѧщеи и приносѧщеи тогда на часте скѹдости бывахѹ потребныхъ ꙗко мнѡгажды наѹтрїѧ и хлѣбѹ не ѡбрѣсти сѧ |
| s-335
| да кто может и сказати недостат꙽кы быв꙽шаѧ прпдбномѹ ѿц҃ѹ нашемѹ сергїю |
| s-336
| исперва егда начинаше сѧ с꙽троити сѧ мѣсто то ѡвогда ѹбо не достало хлѣба и мѹки и пшеницы и всѧкогѡ жита |
| s-337
| иногда ж не достало масла и соли и всѧкого ꙗстїѧ брашен꙽наго |
| s-338
| овогда ж не достало вина имже обѣднѧ слꙋжити и фемїѧнѹ имже кадити |
| s-339
| иногда же не достало воскѹ имже свѣщи скати |
| s-340
| и поꙗхꙋ в нощи заѹтренюю |
| s-341
| не имꙋщи свѣщъ но токмо лѹчиною березевою или сосновою свѣтѧхѹ себѣ |
| s-342
| и тѣмъ нѹжахѹ сѧ канонархати или по книгам чести и сице совершахꙋ нощныѧ слꙋжбы своѧ |
| s-343
| прпдбныи же сергїи всѧкѹ нꙋжꙋ ѡнѹ и теснотѹ и всѧкꙋ скꙋдость и недостаткы терпѧше со бл҃годаренїем ожидаѧ ѿ б҃га богатыѧ млсти |
| s-344
| и слꙋчи сѧ во иное времѧ сицево искꙋшенїе |
| s-345
| Понеж со искѹшенїемъ бывает и млсть бж҃їѧ |
| s-346
| нѣкогда не достало быс хлѣба и соли ѹ игѹмена |
| s-347
| но и во всем манастыри быс ѡскѹдѣнїе всѣх брашенъ |
| s-348
| бѧше ж заповѣд прпдбнаго игѹмена къ всѣм братїѧмъ сицева |
| s-349
| аще когда съключит сѧ таковое искѹшенїе или хлѣба не достанет или бѹдет оскѹдѣнїе всѧкого брашна то не исходити того ради из манастырѧ в꙽ весь нѣкѹю или в село и не просити ѹ мирѧн потребных телесных но сѣдѣти терпѣливе в꙽ манастырѣ и просити и ѡжидати млсти ѿ бг҃а |
| s-350
| да ꙗкоже братїѧмъ велѧше и заповѣдаше сице пач и самъ сїѧ же творѧше и терпѧше и пребыс три дн҃и или четыре не ꙗдꙋщи ничтоже |
| s-351
| минѹв꙽шим꙽ же тремъ д҃нем а четвертомꙋ наставлѧющꙋ и свитающꙋ взем секирѹ прїиде ко единомѹ ѿ старецъ живѹщемꙋ в꙽ манастыри его емѹже имѧ данилъ и рече емѹ |
| s-352
| слышах старче ꙗко хощеши сѣни создати пред кѣлїею си |
| s-353
| и азъ того ради прїидох да рѹцѣ мои не праз꙽днѹета и созиждѹ ѧ тебѣ |
| s-354
| ѿвѣща данилъ и рече емѹ |
| s-355
| еи ѕѣло хощѹ и имамъ из давна таковаѧ приготованїѧ но ѡжидаю древодѣли ѿ села |
| s-356
| тебѣ чинити бою сѧ егда како великѹ м꙽здѹ возмеши ѿ мене |
| s-357
| рече же емѹ сергїи |
| s-358
| азъ не ѕело велика возданїѧ требѹю ѿ тебе |
| s-359
| но имаши ли гнилыѧ хлѣбы |
| s-360
| ѕело бо хѡтѣнїемъ восхотѣ ми сѧ ꙗсти таковыѧ хлѣбы |
| s-361
| иного же болѣ сего ничтоже не требѹю ни прошѹ ѿ тебе мьз꙽довозданїѧ |
| s-362
| ѹ мене бо николиже ѡбрѣтают сѧ таковїи хлѣби |
| s-363
| а не гл҃и старче еже ѡжидати тебѣ иного древодѣли мимо мене |
| s-364
| и кто есть тебѣ инъ сице древодѣль ꙗкоже азъ |
| s-365
| старецъ ж данилъ изнесе емѹ решето хлѣбовъ гнилых с꙽крилевъ гл҃ѧ |
| s-366
| аще сицевыѧ восхотѣ сѧ тебѣ вещи тои и се со тщанїемъ воздаю ти |
| s-367
| болѣ же сего не имам |
| s-368
| ѿвѣща сергїи |
| s-369
| до сыти ми есть и се |
| s-370
| и довлѣет꙽ ми сїе преизлише |
| s-371
| но ѡбаче снабди ѧ до девѧтаго часа |
| s-372
| азъ бо преже рѹцѣ мои не поработасте и преж трꙋда мъзды не прїемлю |
| s-373
| и то рекъ препоꙗса чресла своѧ крѣпко и нача дѣлати и тесати ѿ ѹтра до вечера |
| s-374
| и дъскы всѧ истеса |
| s-375
| такѡж и стол꙽бы издол꙽бе и поставль |
| s-376
| бг҃ѹ помагающꙋ емꙋ сѣни согради до вечера и совръши ѧ |
| s-377
| поздѣ же сѹщи ꙗко в꙽ вечернюю годинꙋ данилъ старецъ паки изнесе емѹ решето хлѣбовъ ѹреченных цена мзды его еже рѹцѣ его поработаста |
| s-378
| сергїи ж прїимъ сїѧ и предложи ѧ пред собою |
| s-379
| и сотворь мл҃твѹ блгсви ѧ |
| s-380
| и нача ꙗсти с водою токмо |
| s-381
| а не бѣ варива ни соли ни влаги |
| s-382
| и обое совокꙋпѧ и ѡбѣд и вечерю ꙗдѧше |
| s-383
| и нѣкоторым ѿ братїѧ видѧше сѧ ѿ ѹстъ его ꙗко дымъ малъ исходѧщъ егда таковыѧ ꙗдѧше хлѣбы |
| s-384
| и тогда дрѹгъ дрѹгꙋ преклонше сѧ г҃лхѹ |
| s-385
| воле братїе колико ес терпѣнїе мѹжа сего и воздержанїе его |
| s-386
| ꙗко пребыс четыре дн҃и ничтож не ꙗдыи и на четвертыи сꙋщѹ поздѣ гнилым хлѣбом алкотѹ свою ѹтѣшаше и ѹставлѧше |
| s-387
| и то же не даром хлѣбъ гнилыи но драгою цѣною прекѹпивъ ꙗдѧше |
| s-388
| нѣкоторыи ж ѿ мних и поропта единъ брат тогда на сергїѧ |
| s-389
| не ꙗдоша бо и по два дн҃и |
| s-390
| и оскор꙽биша сѧ не имѹще чтѡ в꙽кѹсити |
| s-391
| и прїидоша к немѹ и предъ ним поимы и поносы творѧхѹ гл҃юще |
| s-392
| плѣсневїи хлѣби |
| s-393
| еще ли намъ в꙽ миръ не исходити просити хлѣба |
| s-394
| се ѹбо на тя смотрихом ꙗкоже ѹчил ны еси |
| s-395
| и се тебе слѹшающе нн҃ѣ ѹже ищезаем ѿ глада |
| s-396
| того ради ѹтро рано изыдем ѿ мѣста сего камо кождо потребных ради |
| s-397
| да не паки возъвратим꙽ сѧ сѣмо ѹже не могѹще к томѹ терпѣти бываемых недостат꙽ковъ и скѹдости здѣ |
| s-398
| не вси же пороптахѹ но нѣкоторыи брат единъ ѿ них егоже ради и всю братїю созва |
| s-399
| видѣ бо ѧ ослабѣв꙽ша и ѡскорбив꙽ших꙽ сѧ прпдбныи сергїи малодш҃їе ихъ своим длъготерпѣнїем и кроткым обычаем и тихостїю ис꙽правити хотѧ |
| s-400
| ѹчаше ѧ ѿ ст҃ых писанїи ѿ вет꙽хаго и новаго завѣта гл҃ѧ |
| s-401
| въскѹю прискоръбни есте братїе |
| s-402
| въскѹю смѹщаете сѧ |
| s-403
| ѹповаите на бг҃а |
| s-404
| писано бо есть |