| s-1
| Կենտրոնական բանկի միջազգային պահուստները, որոնք արտահայտված են հիմնականում տարադրամով, արագորեն դատարկվում են։ |
| s-2
| Ընդամենը մեկ ամսում դրանք պակասել են 255 մլն դոլարով կամ ավելի քան 11 տոկոսով։ |
| s-3
| Դեկտեմբերի 2 մլրդ 249 մլն դոլարի դիմաց՝ այս տարվա հունվարին ԿԲ արտաքին պահուստները մնացել են 1 մլրդ 994 մլն դոլար։ |
| s-4
| Սա նման կարճ ժամանակահատվածի կտրվածքով բավական կտրուկ անկում է։ |
| s-5
| Թե ո՞ւր են գնացել այս գումարները, հայտնի չէ։ |
| s-6
| Փաստ է, որ դրանք սովորաբար օգտագործվում են երկրի տարադրամային պահանջարկը սպասարկելու համար։ |
| s-7
| Դա լինի արտաքին, թե ներքին հատվածում։ |
| s-8
| Կենտրոնական դրամատան միջազգային պահուստների կրճատման գործում, ըստ էության, որոշակի դեր է ունեցել ներքին արժութային շուկայի պահանջարկի բավարարումը։ |
| s-9
| Առկա է տարադրամային հոսքերի հաշվեկշռի վատացում, ինչը մեծացրել է ճնշումն ազգային արժույթի վրա։ |
| s-10
| Վերջին շրջանում դա արտահայտվում է հատկապես դոլարի դիրքերի ամրապնդման տեսքով։ |
| s-11
| Արդեն բավական ժամանակ ամերիկյան արժույթի գինը գտնվում է 490 դրամի սահմաններում։ |
| s-12
| Թե այն հետագայում ինչպես կդրսևորի իրեն, ցույց կտա ժամանակը։ |
| s-13
| Ամեն դեպքում մի բան ակնհայտ է, որ, թեև այս փուլում վաղ է խոսել դոլարի նկատմամբ դրամի էական անկման մասին, այնուհանդերձ վերջին շրջանի զարգացումները վկայում են, որ դրա վրա ազդող գործոններն ազգային արժույթի համար նպաստավոր դիրքում չեն։ |
| s-14
| Տարադրամային ճնշումը ներքին շուկայում մեծացել է` պայմանավորված մի կողմից՝ արտարժույթի ներհոսքի ցածր ակտիվությամբ, մյուս կողմից` արտահոսքի առաջանցիկ աճով։ |
| s-15
| Որքան էլ ներքաղաքական վերջին իրադարձությունների ընթացքում Հայաստանի արժութային շուկան որոշակի տատանումներից հետո կարողացավ վերականգնել կայունությունը, այնուհանդերձ հաջորդող շրջանում տեղի ունեցող պրոցեսներն այնքան էլ դրա օգտին չեն։ |
| s-16
| Իշխանափոխությունից հետո արժութային շուկայի տարադրամային հոսքերի դինամիկան մտահոգիչ է։ |
| s-17
| Դա ակնհայտ է գրեթե բոլոր ուղղություններով։ |
| s-18
| Մուտքերի նոսրացումն ուղեկցվում է ելքերի ավելացմամբ։ |
| s-19
| Նման դրսևորումները, բնականաբար, բացասական գործոն են՝ ինչպես ընդհանրապես ֆինանսական միջավայրի, այնպես էլ՝ ազգային արժույթի կայունության և շուկայի հավասարակշռության պահպանման համար։ |
| s-20
| Հայաստանի տնտեսության մեջ և արտաքին հատվածում տեղի ունեցող ոչ ցանկալի զարգացումների հետևանքով պակասում են երկիր մտնող տարադրամային հոսքերը։ |
| s-21
| Դա արտահայտվում է՝ ինչպես ներդրումների և ֆիզիկական անձանց փոխանցումների, այնպես էլ՝ արտաքին առևտրի ոլորտում։ |
| s-22
| Չնայած ձևավորված սպասելիքներին, այնուհանդերձ արտաքին կապիտալի հետաքրքրությունները Հայաստանի տնտեսության նկատմամբ, նույնիսկ խորհրդարանական ընտրություններից հետո, շարունակում են չափազանց ցածր լինել։ |
| s-23
| Օտարերկրյա ներդրողները չեն շտապում իրենց գումարները բերել Հայաստան։ |
| s-24
| Այս հատվածից տարադրամային միջոցների ներհոսքն ակտիվություն չի դրսևորում։ |
| s-25
| Ներքին միջավայրից ևս ներդրումային կապիտալի մուտքը ֆինանսական շուկա պասիվ է։ |
| s-26
| Հազիվ թե կարելի է սպասել, որ մոտ ժամանակահատվածում իրավիճակը կփոխվի։ |
| s-27
| Դրա համար բավարար հիմքեր չկան։ |
| s-28
| Գրեթե չկան նոր ներդրումային ծրագրեր, որոնք կարող են նպաստել այս հատվածից տարադրամային հոսքերի ավելացմանը։ |
| s-29
| Խնդիրը, սակայն, միայն ներդրումները չեն։ |
| s-30
| Անցած տարվա վերջից նվազում են ֆիզիկական անձանց արտաքին ֆինանսական փոխանցումները, որոնք կարևոր դեր ունեն ներքին շուկայի տարադրամային պահանջարկի բավարարման գործում։ |
| s-31
| Միայն 2018թ. նոյեմբեր-դեկտեմբերին արտերկրից բանկային համակարգով պակաս է ստացվել գրեթե 30 մլն դոլար։ |
| s-32
| Թեև տարեսկզբի ակտիվ դրսևորումների արդյունքում մուտքերի աճը պահպանվեց, այնուհանդերձ տարեվերջին այն էապես փոքրացավ։ |
| s-33
| Եթե առաջին եռամսյակում ֆիզիկական անձանց փոխանցումները Հայաստան ավելացել էին՝ 14,4, առաջին կիսամյակում` 8,7 տոկոսով, ապա արդեն տարվա կտրվածքով աճը կազմեց հազիվ 1,6 տոկոս։ |
| s-34
| Խոսքը մուտքերի ընդամենը 29 մլն դոլարով ավելանալու մասին է։ |
| s-35
| Փոխարենը՝ մի քանի անգամ ավելի էր այս ոլորտում Հայաստանից դուրս եկող տարադրամի աճը։ |
| s-36
| Անցած տարի բանկային համակարգի միջոցով ֆիզիկական անձինք տարբեր ուղղություններով փոխանցել են գրեթե 1,2 մլրդ դոլար։ |
| s-37
| Նախորդ տարվա համեմատ՝ տարադրամի ելքը տրանսֆերտների շուկայում ավելացել է շուրջ 199 միլիոնով։ |
| s-38
| Արդյունքում` բացասական հաշվեկշիռը խորացել է ևս 170 մլն դոլարով, ինչը լուրջ գումար է Հայաստանի թե՛ ֆինանսական շուկայի, և թե՛ տնտեսության համար։ |
| s-39
| Եթե 2017թ. ֆիզիկական անձանց փոխանցումների զուտ մուտքը հասնում էր 767 մլն դոլարի, ապա 2018թ. կազմեց հազիվ 597 մլն դոլար։ |
| s-40
| Առայժմ Կենտրոնական բանկը կարծես չի շտապում հրապարակել տրանսֆերտային շուկայի տեղաշարժերի այս տարվա սկզբի ցուցանիշները։ |
| s-41
| Թեև դրանց հետ կապված՝ մեծ սպասելիքներ չկան։ |
| s-42
| Ներքին շուկայի տարադրամային հավելյալ կորուստները շատ ավելին են արտաքին առևտրի ոլորտում։ |
| s-43
| Միայն անցած տարի դրանք կազմեցին գրեթե 700 մլն դոլար։ |
| s-44
| Դա արտահայտվեց հիմնականում ներմուծման առաջանցիկ աճի տեսքով։ |
| s-45
| Այդ երևույթը խորացավ հատկապես իշխանափոխությունից հետո։ |
| s-46
| Ներմուծման ֆինանսավորման նպատակով անցած տարի Հայաստանից կրկնակի շատ տարադրամ է դուրս եկել, քան ստացվել է արտահանումից։ |
| s-47
| Տարբերությունն այս հատվածում հսկայական է։ |
| s-48
| Խոսքն ավելի քան 2,5 մլրդ դոլարի մասին է, ինչը լուրջ ճնշում է արժութային շուկայի վրա։ |
| s-49
| Ցավոք, այս միտումը պահպանվում է նաև ընթացիկ տարվա սկզբին։ |
| s-50
| Հունվարին արտահանումից ավելի քիչ արտարժութային միջոցներ են ստացվել, քան 2018թ. նույն ամսում։ |
| s-51
| Տարբերությունը կազմում է 27 մլն դոլար։ |
| s-52
| Թեև կրճատվել է նաև ներմուծման տարադրամային հոսքը, այնուհանդերձ այս դեպքում տարբերությունն ավելի փոքր է` ընդամենը 11 մլն դոլար։ |
| s-53
| Այլ կերպ ասած, այս տարվա սկզբին ևս տարադրամային միջոցների տեղաշարժը շարունակում է բացասական լինել։ |
| s-54
| Արտաքին առևտրի ոլորտում տարադրամի կորուստները միայն հունվարին ավելացել են 16 միլիոնով` հասնելով 172 մլն դոլարի։ |
| s-55
| Ակնհայտ է, որ բոլոր հիմնական ուղղություններով առկա է ոչ նպաստավոր իրավիճակ` ներքին շուկայում ձևավորվող տարադրամային հոսքերի համար։ |
| s-56
| Իհարկե, դրանք չեն սահմանափակվում միայն ներդրումներով, ֆիզիկական անձանց փոխանցումներով և արտաքին առևտրի ոլորտում տեղի ունեցող դրսևորումներով։ |
| s-57
| Այս շրջանակը շատ ավելի լայն է` սկսած զբոսաշրջությունից, վերջացրած արտաքին ֆինանսական պարտավորությունների սպասարկմամբ ու նոր պարտավորությունների ներգրավմամբ։ |