| s-202
| «Ձեր զգայնութիւնները մեր բոլորին զգայնութիւններն են»։ |
| s-203
| Իր կարգին Պատրիարք Հայրն ալ յայտնեց, թէ դէպքը վիրաւորիչ է եւ այս առումով շնորհակալութիւն յայտնեց պատկան մարմիններու ցուցաբերած հետաքրքրութեան համար։ |
| s-204
| Միւս կողմէ, Ներքին գործոց նախարար Սիւլէյման Սոյլու եւ կուսակալ Ալի Երլիքայա հեռախօսային կապ հաստատեցին Ս. Թագաւոր եկեղեցւոյ թաղային խորհուրդի ատենապետ Արման Պիւքիւճեանի հետ եւ կատարուածը անընդունելի որակելով իրենց ցաւը յայտնեցին։ |
| s-205
| Բաց աստի, Գատըգիւղի քաղաքապետ Շերտիլ Տարա Օտապաշըն եւս կապ հաստատեց Գատըգիւղի թաղային խորհուրդի փոխ-ատենապետ Կարօ Պալեանի հետ եւ ինք եւս պախարակեց աղօթավայրի դէմ գործուած այս դէպքը։ |
| s-206
| Երեքշաբթի, Յուլիս 13, 2021 |
| s-207
| ՇՔԵՂ ԸՆԴՈՒՆԵԼՈՒԹԻՒՆ ՖՐԱՆՍԱԿԱՆ ՊԱԼԱՏԻՆ ՄԷՋ |
| s-208
| Յուլիսի 14-ի՝ Ֆրանսայի ազգային տօնին առթիւ երէկ երեկոյեան պաշտօնական ընդունելութիւն մը տեղի ունեցաւ քաղաքիս Ֆրանսական պալատին մէջ, Պէյօղլու։ |
| s-209
| Անգարայի մօտ Ֆրանսայի դեսպան Էրվէ Մակրօ եւ Իսթանպուլի մօտ Ֆրանսայի աւագ հիւպատոս Օլիվիէ Կովէնի տանտիրութեամբ կազմակերպուեցաւ այս բացօթեայ հաւաքոյթը։ |
| s-210
| Ֆրանսական պալատի շքեղ պարտէզներուն մէջ նախ նուագուեցան Թուրքիոյ եւ Ֆրանսայի քայլերգները, աւելի վերջ ալ ողջոյնի խօսքերով հանդէս եկան աւագ հիւպատոսն ու դեսպանը։ |
| s-211
| Երէկուան պաշտօնական ընդունելութեան մասնակցեցաւ Թուրքիոյ Հայոց Պատրիարք Ամեն. Տ. Սահակ Ս. Արք. Մաշալեան, որ դեսպան Էրվէ Մակրոնին եւ աւագ հիւպատոս Օլիվիէ Կովէնին շնորհաւորութիւններ յղեց Ֆրանսայի ազգային տօնին առթիւ։ |
| s-212
| Ընդունելութեան հրաւիրուած էր նաեւ Կաթողիկէ հայոց վիճակաւոր Տ. Լեւոն Արք. Զեքիեան։ |
| s-213
| Ամեն. Ս. Պատրիարք Հօր ուղեկցեցաւ Տ. Շիրվան Քհնյ. Միւրզեան։ |
| s-214
| Բացի փոքրամասնութիւններու հոգեւոր առաջնորդներէն, այս ընդունելութեան ներկայ գտնուեցան բարձրաստիճան դիւանակալներ, քաղաքիս մէջ հաւատարմագրուած դիւանագէտներ, քաղաքական գործիչներ, մտաւորականներ, արուեստագէտներ, հասարակական գործիչներ, զանգուածային լրատուութեան աշխարհէն դէմքեր, գործարարներ եւ այլ հիւրեր։ |
| s-215
| Երեքշաբթի, Յուլիս 13, 2021 |
| s-216
| ԱՒԱՆԴՈՒԹԻՒՆՆԵՐՈՒ ԹԱՏԵՐԱԲԵՄԸ |
| s-217
| Վարդավառ էր երէկ, Հայ Առաքելական Եկեղեցին նշեց Պայծառակերպութեան տօնը։ |
| s-218
| Աւանդական տօնակատարութիւններ տեղի ունեցան մեր եկեղեցիներուն մէջ՝ մանաւանդ, Գնալըի բարձունքին ոգեւորութիւնը շատ բարձր էր եղանակի բերումով։ |
| s-219
| Եկեղեցական արարողութիւններուն առընթեր, կղզիի վրայ մեր համայնքի անդամները բազում խրախճանքներ կազմակերպեցին։ |
| s-220
| Բնակարաններու պարտէզները, փողոցները թատերաբեմը հանդիսացան՝ վերակենդանացեալ աւանդութիւններու։ |
| s-221
| Տօնակատարութիւնը լոկ ծէս մըն է, եթէ հաւատ չկայ անոր մէջ։ |
| s-222
| Թատրոնի կը վերածուի ամէն ինչ։ |
| s-223
| Հաւատն է, որ իր առթած հոգեւոր ուրախութիւնով կու տայ իմաստը։ |
| s-224
| Տրամադրութիւնը կը բարձրանայ, երբ որ մարդիկ բաժնեն այդ ապրումները։ |
| s-225
| Հաւատի հասարակաց յայտարարին վրայ, հաւատակից քոյրերու եւ եղբայրներու միասնականութեան բերած ուրախութիւնը բանալին է իսկական պայծառակերպման։ |
| s-226
| Երկուշաբթի, Յուլիս 12, 2021 |
| s-227
| ՎԱՐԴԱՎԱՌԸ ԳՆԱԼԸ ԿՂԶԻԻ Ս. ԳՐԻԳՈՐ ԼՈՒՍԱՒՈՐԻՉ ԵԿԵՂԵՑՒՈՅ ՄԷՋ |
| s-228
| Երէկ, Վարդավառի տօնին առթիւ Գնալը կղզիի Ս. Գրիգոր Լուսաւորիչ եկեղեցւոյ մէջ տեղի ունեցան աւանդական տօնակատարութիւններ։ |
| s-229
| Պայծառակերպութեան տաղաւարի առթիւ պատարագեց տեղւոյն հոգեւոր հովիւը՝ Տ. Յարութիւն Աբեղայ Տամատեան, որ խօսեցաւ նաեւ օրուան քարոզը։ |
| s-230
| Նկատի ունենալով համաճարակի մթնոլորտը՝ հաւատացեալներ եկեղեցւոյ մէջ չընդունուեցան եւ պարտէզին մէջ զետեղուած նստարաններուն վրայ հետեւեցան Ս. Պատարագին։ |
| s-231
| Միւս կողմէ, Թուրքիոյ Հայոց Պատրիարք Ամեն. Տ. Սահակ Ս. Արք. Մաշալեանն ալ Գնալը կղզիի Ս. Գրիգոր Լուսաւորիչ եկեղեցւոյ մէջ շաբաթավերջին նախագահեց Հսկման արարողութեան։ |
| s-232
| Պայծառակերպութեան տաղաւարի նախօրեակին Գնալը Կղզիի Ս. Գրիգոր Լուսաւորիչ եկեղեցւոյ մէջ, աւանդութիւն դարձած է Հսկման արարողութիւն կատարել։ |
| s-233
| Այս տարի, շաբաթ երեկոյեան կատարուած արարողութեան նախագահեց Ամեն. Ս. Պատրիարք Հայրը։ |
| s-234
| Արարողութեան մասնակցեցան եկեղեցւոյ հոգեւոր հովիւ Տ. Յարութիւն Աբեղայ Տամատեան, Պատրիարքական փոխանորդ Տ. Գրիգոր Ա. Քհնյ. Տամատեան, Տ. Ներսէս Քհնյ. Այվազեան, Սայաթ Սրկ. Չընարեան եւ դպիրներ։ |
| s-235
| Մութ եկեղեցւոյ խորհրդաւոր մթնոլորտին մէջ կը պլպլային մոմերու ճրագները, որով աղօթքի միջավայրը առաւել եւս կը ներկայանար իր խորհրդաւոր ազդեցութեամբ։ |
| s-236
| Առ այդ, երգուած շարականներուն, Ս. Գրիգոր Նարեկացիի աղօթամատեանէն ընթերցման ու Ս. Ներսէս Շնորհալի Հայրապետի աղօթքի տողերուն միացան նաեւ հաւատացեալներ։ |
| s-237
| Արարողութիւնը իր աւարտին հասաւ վերջին օրհնութեամբ։ |
| s-238
| Երկուշաբթի, Յուլիս 12, 2021 |
| s-239
| ՄՕՏԵՑՈՒՄՆԵՐԸ ԿՇԻՌՔԻ ՎՐԱՅ |
| s-240
| Ֆէրիգիւղի «Ալաճաճեան» սրահին մէջ երէկ երեկոյեան շարունակուեցաւ պոլսահայ կրթական համակարգի առկայ մարտահրաւէրներուն շուրջ քննարկումները։ |
| s-241
| Նիւթական անբաւարարութիւնները այնպիսի մակարդակի մը հասած են, որ պոլսահայ կրթական համակարգի գործունէութիւնը կաթուածահարման եզրին բերած են։ |
| s-242
| Ստեղծուած իրավիճակին մէջ հետզհետէ աւելի կը բարձրաձայնուի եւ հետզհետէ աւելի յաճախակիօրէն օրակարգի վրայ կը բերուի մեր կարգ մը վարժարաններու միացման ստիպողութիւնը։ |
| s-243
| Սա թէեւ գործնականին մէջ կարգ մը դպրոցներու փակում կը նշանակէ, սակայն, համակարգուած աշխատանքի մը շնորհիւ կարելի կրնայ ըլլալ հետեւանքները որոշ չափով մեղմացնել։ |
| s-244
| Քորոնաժահրի համաճարակի սահմանափակումներու մեղմացման զուգահեռ, վերջերս համայնքային վարիչները Ֆէրիգիւղի «Շիրինօղլու» սրահին մէջ ժողով մը գումարած էին՝ Թրքահայ վաքըֆներու միութեան (ԹՎՄ-ERVAB) ձեւաչափին մէջ։ |
| s-245
| Թուրքիոյ Հայոց Պատրիարք Ամեն. Տ. Սահակ Ս. Արք. Մաշալեանի եւ Սուրբ Փրկիչ Ազգային հիւանդանոցի հոգաբարձութեան ատենապետ Պետրոս Շիրինօղլուի գլխաւորութեամբ շաբաթ մը առաջ տեղի ունեցած խորհրդակցութեան ընթացքին որոշուած էր աշխատանքային քննարկումներու շարք մը կազմակերպել՝ մեր դպրոցներու առկայ հարցերուն շուրջ վերջնական որոշումներ ընդունելու առաջադրութեամբ։ |
| s-246
| Երէկուան ժողովը այդ աշխատանքային քննարկումներու փուլի սկիզբը կը համարուէր։ |
| s-247
| Հիւրընկալ Ֆէրիգիւղի եկեղեցւոյ թաղային խորհուրդի ատենապետ Մանուկ Էօղէր գլխաւորեց ժողովը։ |
| s-248
| Որպէս դիտորդ՝ մասնակցեցան նաեւ Պատրիարքական փոխանորդ Տ. Գրիգոր Ա. Քհնյ. Տամատեան եւ Սուրբ Փրկիչ Ազգային հիւանդանոցի հոգաբարձութեան կողմէ Գէորգ Ներկիզ։ |
| s-249
| Այս փուլին թրքահայ գրեթէ բոլոր վարժարաններու ներկայացուցիչները իրենց մօտեցումները կշիռքի վրայ դրին՝ փոխադարձ ըմբռնումի մը հասնելու, լուծման գործնական ենթագետին մը ապահովելու առաջադրութեամբ։ |
| s-250
| Համայնքային վարիչները ներկայ դժուարին փուլին կողմնակից են՝ վարժարաններու փակման կամ միացման հարցերու պարագային առաջնորդուիլ մասնագէտներու կարծիքով։ |
| s-251
| Երէկուան ժողովի ընթացքին արձանագրուած կարեւորագոյն հանգամանքներէն մին էր այս մէկը։ |
| s-252
| Խորհրդակցութեան մասնակցեցան Ֆէրիգիւղի Ս. Վարդանանց եկեղեցւոյ թաղային խորհուրդէն Մանուկ Էօղէր եւ Նուրհան Փալաքօղլու, Սամաթիոյ Ս. Գէորգ եկեղեցւոյ թաղային խորհուրդէն Նուրհան Տավուլճեան եւ Պերճ Քէօսէօղլու, Ղալաթիոյ խնամակալութենէն Վարդան Սիմքէշեան, Եշիլգիւղի Ս. Ստեփանոս եկեղեցւոյ թաղային խորհուրդի ատենապետ Հապիպ Էօզֆուրունճու, Գատըգիւղի Արամեան-Ունճեան վարժարանի հիմնադրի ներկայացուցիչ Սարվէն Սերթշիմշէք, Թոփգաբուի Ս. Նիկողայոս եկեղեցւոյ թաղային խորհուրդի ատենապետ Շանթ Չաքմաքճը եւ անդամներէն Նուրհան Սուճուեան, Սուրբ Խաչ դպրեվանքի տնօրէն Արմէն Սարուխանեան, Պէզճեան Մայր վարժարանի հիմնադրի ներկայացուցիչ Նուրհան Ճէմճէմ, Մխիթարեան վարժարանի հիմնադրի ներկայացուցիչ Պերճ Մենզիլճիօղլու, Սամաթիոյ Անարատ Յղութիւն վարժարանի տնօրէն Շահին Չընար եւ Պոմոնթիի Մխիթարեան վարժարանի տնօրէն Գարեգին Պարսամեան։ |
| s-253
| Գալֆաեան Տան եւ Օրթագիւղի Թարգմանչաց վարժարանի ներկայացուցիչները նախապէս տեղեակ պահելով բացակայեցան խորհրդակցութենէն։ |
| s-254
| Գարակէօզեան Տան խնամակալութեան, Պէյօղլուի Ս. Եկեղեցեաց թաղային խորհուրդի եւ Պաքըրգիւղի Ծն. Ս. Աստուածածին եկեղեցւոյ թաղային խորհուրդի ներկայացուցիչները ընդհանրապէս չմասնակցեցան քննարկումներուն։ |
| s-255
| Մանուկ Էօղէրի ողջոյնի խօսքէն վերջ կազմուեցաւ աշխատանքային խումբի դիւան մը։ |
| s-256
| Նուրհան Փալաքօղլուին վստահուեցաւ համակարգողի պաշտօնը։ |
| s-257
| Իւրաքանչիւր վարժարանի մատակարար մարմնի ատենապետը պիտի համարուի կրթական հարցերու վերաբերեալ աշխատանքային խումբի անդամ։ |
| s-258
| Այդ աշխատանքային խումբը ERVAB-ի հովանոցին տակ պիտի գործէ եւ նոյն քարտուղարութենէն պիտի օգտուի։ |
| s-259
| Ժողովականներ քննարկումի ընթացքին թեր ու դէմ կարծիքներով հանդէս եկան մեր կրթական համակարգի վերաբերեալ հրատապ հարցերու շուրջ։ |
| s-260
| Այդ ամբողջին մէջ ընդգծուեցան կրթութեան որակի բարձրացման եւ մարդուժի պատրաստութեան անհրաժեշտութիւնները։ |
| s-261
| Նուրհան Փալաքօղլու նշեց, որ կրթութեան մակարդակը բարձրացնելով կարելի է ապահովել, որ մեր համայնքի զաւակները ոչ-համայնքային դպրոցներ չյաճախեն։ |
| s-262
| Առկայ խնդիրները շատ բարդ են եւ լուծումը ժամանակի կը կարօտի։ |
| s-263
| Կան նաեւ տնտեսական հարցերը, համատեղ միջոցներ գոյացնելու խնդիրները, որոնք կրնան յաղթահարուիլ միայն զոհողութեան մօտեցումով։ |
| s-264
| Գէորգ Ներկիզ ընդգծեց, որ ոեւէ մէկը թէեւ դպրոց փակել չ՚ուզեր, սակայն խնդիրները պէտք է ձեռք առնուին ինքնաքննադատաբար։ |
| s-265
| Ան դիտել տուաւ, որ այսօր նոյնիսկ մեր վարժարաններու վարիչները իրենց զաւակները չեն ուղարկեր իրենց ղեկավարած դպրոցը։ |
| s-266
| «Թէ ինչպէ՞ս կարելի է այս երեւոյթը բացատրել այն ծնողներուն, որոնք իրենց զաւակները կը բերեն մեր վարժարանները։ |
| s-267
| Այսօր ամէն ինչ նիւթականէ կախեալ դարձած է։ |
| s-268
| Նիւթապէս ինքնաբաւ եւ անբաւարար եղող դպրոցներու միջեւ տարբերութիւնները պէտք չէ շատ մեծ ըլլան։ |
| s-269
| Մի միայն ելմտական տուեալներու հիման վրայ չենք կրնար որոշել դպրոցներու միացման կամ փակման հարցերը», ըսաւ Գէորգ Ներկիզ։ |
| s-270
| Իր կարգին, Տ. Գրիգոր Ա. Քհնյ. Տամատեանն ալ նշեց, որ մեր համայնքը երբեք կեդրոնաձիգ մտայնութիւն չէ ունեցած եւ այս հարցին վրայ կու գայ աւելնալ գործադիր ընդհանրական վարչական դրութեան մը բացակայութեան երեւոյթը։ |
| s-271
| Կրթական հաստատութիւններու բեռը կը մնայ սահմանափակ մարդոց վրայ եւ դժբախտաբար համայնքի մեծամասնութեան կողմէ անտարբերութիւն կը ցուցաբերուի։ |
| s-272
| Ուրբաթ, Յուլիս 9, 2021 |
| s-273
| ԱՆԹԻԼԻԱՍԻ ՄԷՋ ԶՐՈՅՑ |
| s-274
| Մեծի Տանն Կիլիկիոյ Տ.Տ. Արամ Ա. Կաթողիկոսը երէկ առաւօտ Անթիլիասի մէջ ընդունեց Թուրքիոյ Կաթողիկէ հայոց վիճակաւոր Տ. Լեւոն Արք. Զեքիեանը, որ միջոցէ մը ի վեր Լիբանանի մէջ կը գտնուի՝ մասնակցելու համար Հայ Կաթողիկէ Եկեղեցւոյ Ս. Սինոդի նստաշրջանին։ |
| s-275
| Կիլիկեան Աթոռի աղբիւրները հաղորդեցին, որ Արամ Ա. Կաթողիկոս եւ Զեքիեան Գերապայծառ զրոյցի ընթացքին անդրադարձան Վատիկանի մէջ վերջերս տեղի ունեցած՝ Լիբանանի քրիստոնեայ հոգեւոր առաջնորդներու ժողովին, Հռոմէական Կաթոլիկ Եկեղեցւոյ Քահանայապետ Ֆրանսիսկոս Ա. Սրբազան Պապի մասնակցութեամբ։ |
| s-276
| Հանդիպման ընթացքին շօշափուեցան նաեւ Հայ Կաթողիկէ Եկեղեցւոյ նոր պատրիարքի ընտրութեան գործընթացին վերաբերեալ զանազան հարցեր։ |
| s-277
| Հայ Կաթողիկէ Եկեղեցւոյ Ս. Սինոդը երկշաբաթեայ աշխատանքէ մը վերջ չյաջողեցաւ ընտրել նոր պատրիարքը։ |
| s-278
| Ս. Սինոդի նիստերուն մասնակցեցաւ նաեւ Զեքիեան Գերապայծառ։ |
| s-279
| Այժմ նոր պատրիարքի ընտրութեան գործընթացի յաջորդ փուլերու վերաբերեալ իրադարձութիւններուն կը սպասուի հետաքրքրութեամբ։ |
| s-280
| Հինգշաբթի, Յուլիս 8, 2021 |
| s-281
| ՊԱՏՐԻԱՐՔԱՐԱՆԻ ՄԷՋ ՀԻՒՐԵՐ |
| s-282
| Թուրքիոյ Հայոց Պատրիարք Ամեն. Տ. Սահակ Ս. Արք. Մաշալեան, նախընթաց օր ընդունեց Թոփգաբուի Ս. Նիկողայոս եկեղեցւոյ թաղային խորհուրդի անդամները՝ գլխաւորութեամբ ատենապետ Շանթ Չաքմաքճըի։ |
| s-283
| Պատրիարքարանի մէջ տեղի ունեցաւ այցելութիւնը, որու ընթացքին թաղականները Նորին Ամենապատուութեան տեղեկութիւններ փոխանցեցին եկեղեցւոյ եւ թաղի Լեւոն-Վարդուհեան վարժարանի գործունէութեանց մասին։ |
| s-284
| Ապա շնորհակալութիւն յայտնեցին անոր՝ վարժարաններու հանդէպ ցոյց տուած հայրական հետաքրքրութեան համար։ |
| s-285
| Նորին Ամենապատուութիւնը լսելով այցելուներու փոխանցած տեղեկութիւնները՝ իր գաղափարները յայտնեց եւ հայրական թելադրութիւններ ըրաւ։ |
| s-286
| Ան յիշեցուց, թէ համայնքը դժուարին շրջանէ մը կ՚անցնի համավարակի պատճառով եւ մաղթեց, որ համայնքային հաստատութիւնները նուազագոյն վնասով դուրս գան։ |
| s-287
| Իր խօսքերու աւարտին Պատրիարք Հայրը յաջողութիւն մաղթեց թաղականներուն։ |